Hesab edirəm ki, Beynəlxalq Cinayət Məhkəməsinin (BCM) Benyamin Netanyahu və Yoav Qalant haqqında həbs qərarı ikili standartların açıq təzahürüdür. Bu, İsraili və onun özünümüdafiə hüququnu qanuniləşdirməyə yönəlmiş siyasi motivli qərardır.

Bunu "Xalq Cəbhəsi"nə İsrailli ictimai xadim, “Yerusəlimin əli” təşkilatının rəhbəri, lobbist Barux Leviev deyib.

O, qeyd edib ki, İsrail müstəqil məhkəmə sistemi olan demokratik dövlətdir və əsl müharibə cinayətkarları cəzasız qalarkən daim sıx və əsassız təzyiqlərə məruz qalır:

"Məsələn, Suriya prezidenti Bəşər Əsəd on ildən artıqdır ki, öz xalqına qarşı vəhşiliklər, o cümlədən kimyəvi silahdan istifadə, qırğınlar və işgəncələr edib. Geniş sübutlara baxmayaraq, o, beynəlxalq məhkəmələr tərəfindən məsuliyyətə cəlb edilməyib.

Oxşar vəziyyəti İranda da görmək olar, burada rejim liderləri illərlə öz əhalisini sıxışdırıb, kütləvi edamlar həyata keçirib və bütün dünyada terrorçu qrupları dəstəkləyiblər, lakin onların əməlləri nadir hallarda beynəlxalq təqiblərə məruz qalıb".

İsrailli ekspert daha sonra vurğulayıb: "Aydındır ki, BCM kütləvi insan haqlarının pozulmasına görə məsuliyyət daşıyan avtoritar rejimləri təqib etməkdənsə, diqqətini İsrail kimi demokratik ölkələrə yönəltməyə üstünlük verir. Bu, məhkəməyə inamı sarsıdır və onu ədalətdən daha çox siyasi təzyiq alətinə çevirir. İsrailin ölkənin və vətəndaşlarının təhlükəsizliyi üçün fəaliyyət göstərən liderlərini və əsgərlərini qorumaq öhdəliyi var".

Cavid