"The Telegraph" yazır ki, Maryland və Columbia sahəsinin rəsmiləri prezident Donald Trampın məhkəməyə cəlb edilməsi üçün federal iddia qaldırıblar. Onlar Trampı özünün qlobal biznes imperiyasını əldən buraxmamaqla Konstitusiyanı pozmaqda ittiham edirlər.
Rəsmilər bildirirlər ki, prezidentin hərəkəti Konstitusiyanın "bəxşişlər" barədə maddəsini pozur. Bu maddə prezidentə vəzifə başında olduğu müddətdə xarici hökumətlərdən hər hansı hədiyyələri qəbul etməyi qadağan edir. Konstitusiya tarixçiləri bu iddianı misilsiz adlandırıblar, Ağ Ev isə heç bir pozuntunun baş vermədiyində israr edir.
Şikayət ərzizəsində deyilir: "Prezident Trampın biznes imperiyasındakı maraqlarını saxlaması onu çox sayda xarici və daxili fiqurlarla əlaqəyə bulaşdırır və bu da Konstitusiyanı pozaraq qanunun aliliyini və siyasi sistemimizi şübhə altına alır". Məqalədə deyilir ki, hakimin bu mühakiməyə başlanmasına icazə verdiyi təqdirdə Trampın uzun müddətdir gizlədilən vergi sənədlərinin açıqlanması icbari olacaq.
Bu iş barədə məlumat verən Maryland baş prokuroru Brian Froş deyib ki, liderlər öz biznes maraqlarına yox, xalqa xidmət etməlidirlər. Şikayətçilər diqqəti vəzifəli əcnəbi qonaqların Trampın otellərində qalmasını və bununla da Trampa maliyyə mənfəəti verdiklərinə çəkirlər. Adı çəkilən obyektlərdən biri də Vashinqtonda təzəcə açılmış Tramp International Hotel mehmanxanasıdır.
Amerika Konstitusiya Cəmiyyətinin prezidenti Karoline Fredrickson ABŞ prezidentinin bəxşişlər haqqında maddəni pozmasına görə məhkəməyə verilməsini misli görünməmiş hadisə adlandırıb. Ağ Evin sözçüsü Sean Spicer deyib ki, iddialar siyasi motivlidir və prezidentin vəkilləri ərizənin rədd edilməsi üçün müraciət hazırlayırlar.