Çin gəmiqayırma şirkətləri, dünyanın ilk metanol yanacağı ilə işləyən super böyük neft tankeri olan Kaitonu suya salıb.

Xalqcebhesi.az xəbər verir ki, Çin Mərkəzi Televiziyasının məlumatına görə, 333 metr uzunluğundakı gəmi təxminən 2,1 milyon barel xam neft daşıya bilir.

Kaito, metanol inyeksiya sistemi olan ikili yanacaqlı mühərriklə işləyir ki, bu da ənənəvi yanacaq yağı ilə müqayisədə karbon qazı emissiyalarını 92%, kükürd oksidlərini isə 99% azaldır.

Tankerin, maye yüklərin idarə edilməsini, mühərrik otağının istismarını və texniki xidmətini optimallaşdıran, gəminin yanacaq qənaətini, səmərəliliyini və təhlükəsizliyini əhəmiyyətli dərəcədə yaxşılaşdıran ağıllı platforma ilə təchiz edildiyi də bildirilib.

Tanker, Çin Dövlət Gəmiqayırma Korporasiyasının Dalian filialı tərəfindən inşa edilib və Yaxın Şərq ilə Uzaq Şərq marşrutuna xidmət göstərəcək.

Məryəm Quliyeva