Mariya Zaxarovanın bəyanatının Kremlin mövqeyində real bir dəyişikliyə işarə etməsi ehtimalı azdır. Genişmiqyaslı müharibə dövründə Rusiya rəhbərliyi dəfələrlə siyasi və diplomatik yolla nizamlanmaya hazır olduğunu bəyan etsə də, həmişə elə şərtlər irəli sürüb ki, bunlar faktiki olaraq Ukraynadan Rusiyanın ələ keçirdiyi əraziləri tanımağı və suverenliyinin bir hissəsindən imtina etməyi tələb edir. Buna görə də, belə bəyanatları güzəştə getmək istəyinin göstəricisi kimi deyil, daha çox diplomatik ritorikanın bir elementi kimi qəbul etmək daha düzgündür.

Bunu xalqcebhesi.az-a bunu İntermariun İnstitutunun rəhbəri, ukraynalı politoloq Valentin Hayday deyib.

Xatırladaq ki, Rusiya Xarici İşlər Nazirliyinin sözçüsü Mariya Zaxarova brifinqdə bildirib ki, Rusiya Ukrayna böhranının siyasi-diplomatik yolla həlli ideyasından heç vaxt imtina etməyib və buna hazırdır.

Hayday deyib ki, onun Alyaskada əldə edilmiş razılaşmaların xatırlanması da diqqətəlayiqdir. Bu, Moskvanın danışıqlarda əlverişli mövqelərini möhkəmləndirmək və onları gələcək dialoq üçün əsas kimi təqdim etmək istəyini nümayiş etdirir.

Bununla belə, tərəflərdən biri silahlı təcavüzün nəticələrinin legitimləşdirilməsini tələb etməyə davam etdiyi və məcburedici güc tətbiqindən imtina etmək niyyəti göstərmədiyi təqdirdə, davamlı sülhə nail olmaq mümkün deyil:

"Bundan əlavə, bu cür bəyanatlar Rusiyanın Ukraynanın infrastrukturuna və mülki hədəflərinə qarşı davam edən zərbələri fonunda səsləndirilir. Bu vəziyyət diplomatiya ilə bağlı ictimai ritorika və döyüş meydanındakı real hərəkətlər arasında aşkar bir uyğunsuzluq yaradır. Məhz buna görə də bir çox beynəlxalq müşahidəçi bu cür bəyanatları Rusiyanı guya danışıqlara açıq tərəf kimi təqdim etmək, eyni zamanda irəliləyişin olmamasına görə məsuliyyəti Ukrayna və onun Qərbli tərəfdaşlarının üzərinə yıxmaq cəhdi kimi qiymətləndirir.

Nəhayət, Rusiyanın sülh yolu ilə nizamlanmaya hazır olub-olmadığı rəsmi şəxslərin bəyanatları ilə deyil, konkret addımlarla qiymətləndirilməlidir. Moskva təcavüzü dayandırmaq, qoşunlarını işğal olunmuş ərazilərdən çıxarmaq və beynəlxalq hüququn fundamental normalarına riayət etmək istəyi nümayiş etdirmədiyi müddətcə, bu cür bəyanatlar ədalətli və davamlı sülhə olan səmimi istəyin təzahürü kimi deyil, daha çox siyasi və informasiya xarakterli təsir vasitələri kimi görünür".

Cavid