Bakı şəhəri, Suraxanı rayonunda yerləşən Sovet İttifaqı Qəhrəmanı Əmi Məmmədov adına 101 saylı orta məktəbdə şagird, müəllim və valideynlər arasında dava düşüb.
Bu barədə "Report"a Suraxanı Rayon Polis İdarəsinin 31-ci Polis Bölməsindən məlumat verilib. Məlumata görə, kütləvi dava zamanı 5 nəfər xəsarət alıb.
Məlumata görə, məktəbdə dərs zamanı 10 b sinif şagirdi Ramin Zeynalov 11-ci sinif şagirdi İntiqam Abidov tərəfindən sinifdə döyülüb. Hadisə 10 b sinifinin rəhbəri Aynurə Hüseynzadənin sinifdə olduğu vaxt qeydə alınıb.

Məlum olub ki, davaya səbəb 10 b sinif şagirdi Ramin Zeynalovun sinif yoldaşı Gövhər Yaqubova ilə mübahisəsi olub. İntiqam Abidov isə özünü Gövhər Yaqubovanın sevgilisi kimi qələmə verib. Ramin Zeynalovun anası Zəminə Zeynalova davadan xəbər tutaraq məktəbə gedib. Onunla Gövhər Yaqubova arasında mübahisə düşüb. Gövhər Yaqubova isə anası Tamara Yaqubovanı, dayısı Orxan Məmmədovu və nənəsi Tamara Məmmədovanı məktəbə çağırıb. Nəticədə 47 yaşlı Zəminə Zeynalova döyülərək 3 saylı Şəhər Klinik Xəstəxanasına yerləşdirilib.
Gövhər Yaqubovanın dayısı Orxan Məmmədov isə balta ilə Ramin Zeynalovun üzərinə hücum çəkib. Ramin Zeynalov və onun bacısı Təhminə Zeynalova da döyülərək bədən xəsarətləri alıb. Münaqişənin qarşısını almaq istəyən məktəbin psixoloqu Mətanət Rəhimova və direktor müavini Elnarə Məmmədova da döyülüb.
Suraxanı Rayon Polis İdarəsinin 31-ci Polis Bölməsinin əməkdaşları məktəbə gedib, müəllim və valideynlərin izahatı alınıb. Araşdırma aparılır.