Azərbaycanın Qırğızıstandakı səfiri Hidayət Orucov bu ölkənin Xarici İşlər naziri Çingiz Aydarbekovla görüşüb. Çingiz Aydarbekov Azərbaycan və Qırğızıstan dövlət başçılarının siyasi iradəsinin, aparılan intensiv dialoqun ölkələrimiz arasında əlaqələrin inkişafı üçün əlverişli zəmin yaratdığını bildirib.
Nazir Azərbaycan Prezidenti İlham Əliyevin 2018-ci il sentyabrın 3-də Qırğızıstana, Qırğızıstanın dövlət başçısı Sooronbay Jeenbekovun 2019-cu il oktyabrın 14-də Azərbaycana səfərlərinin münasibətlərin inkişafında yeni mərhələnin başlanğıcı olduğunu deyib. O, həmin səfərlər zamanı aparılan danışıqların iki ölkə arasında əlaqələrin genişlənməsində xüsusi əhəmiyyət kəsb etdiyini vurğulayıb. Ç.Aydarbekov səfirliyin iki ölkə arasında münasibətlərin dinamik inkişafa verdiyi töhfələri yüksək qiymətləndirib.
Hidayət Orucov iki ölkə arasında münasibətlərin bütün sahələrdə inkişafının Azərbaycan və Qırğızıstan prezidentləri İlham Əliyev və Sooronbay Jeenbekov üçün prioritet istiqamət olduğunu bildirib. O, iqtisadi sahədə münasibətlərin inkişaf etdiyini və bu sahədə yüksək səviyyəli əməkdaşlıq üçün kifayət qədər potensialın mövcud olduğunu deyib.
Səfir Azərbaycan-Qırğızıstan Hökumətlərarası Birgə Əməkdaşlıq Komissiyasının üçüncü iclasının Protokolunun icrası ilə bağlı fəaliyyətin davam etdiyini söyləyib. Diplomat əmin olduğunu bildirib ki, bundan sonra da iki ölkə arasındakı əlaqələr bütün sahələrdə yüksələn xətt üzrə inkişaf edəcək. Görüşdə Qırğızıstan-Azərbaycan əməkdaşlığının indiki vəziyyəti və perspektivləri ətrafında fikir mübadiləsi aparılıb, digər aktual məsələlər müzakirə olunub.