Bakı Şəhər Mədəniyyət Baş İdarəsinin təşkilatçılığı ilə Xətai Sənət Mərkəzində “Bahar sevinci” adlı konsert keçirilib. Şüvəlan qəsəbə Mədəniyyət evi və Xətai rayon Mədəniyyət Mərkəzinin birgə təqdim etdiyi Novruz bayramına həsr olunmuş konsertdə “Səma” rəqs ansamblı çıxış edib.
Tədbirdə Milli Məclisin deputatı, Mədəniyyət komitəsinin sədr müavini, 14 saylı Xəzər - Pirallahı seçki dairəsi üzrə millət vəkili Günay Əfəndiyeva, Baş İdarənin rəisi İbrahim Əliyev, Özbəkistan, Rumıniya, Tacikistan, Türkmənistan, Meksika Birləşmiş Ştatlarının, Braziliya, Türkiyə, Qazaxıstan və Azərbaycan Respublikasındakı fövqəladə və səlahiyyətli səfirləri və nümayəndələri, mədəniyyət işçiləri və digər qonaqlar iştirak ediblər.
Konsertdə “Səma” rəqs ansamblı tərəfindən Azərbaycan və Türk Dünyası ölkələrinin milli rəqsləri nümayiş olunub.
Tədbirdə çıxış edən millət vəkili Günay Əfəndiyeva milli adət-ənənələrimizin və mənəvi dəyərlərimizin yaşadılmasına verdikləri töhfəyə görə “Səma” rəqs ansamblının rəhbərliyinə və kollektivinə təşəkkürünü bildirərək, vurğulayıb: “Bu gün qədim Novruz bayramı ərəfəsində “Səma” rəqs ansamblının uşaqları bizə baharın gözəl ətrini, yeni nəfəsini yaşatdılar. Burada rəqslərini nümayiş etdirən uşaqlarımız azad, müstəqil, öz əzəli torpaqlarını qaytarmış və ərazi bütövlüyünü tam bərpa etmiş Azərbaycanın qürurlu övladlarıdır. Bu gün bizim uşaqlarımız öz ifaları ilə həm də Türk dünyasına olan sevgilərini göstərdilər”.
Günay Əfəndiyeva “Səma” rəqs ansamblının bədii rəhbəri Səma Sadıqovaya təşəkkürnamə təqdim edib.
Daha sonra Şüvəlan qəsəbə Mədəniyyət evi və Xətai rayon Mədəniyyət Mərkəzinin rəsm dərnəyinin üzvlərinin əl işlərindən ibarət sərgiyə baxış keçirilib.
Sonda xatirə şəkilləri çəkilib, qonaqlara hədiyyələr təqdim olunub.