“Kremlin Rusiya–Ukrayna münaqişəsi çərçivəsində danışıqların vaxtı və məkanını açıqlamaması diqqət çəkən diplomatik taktika kimi qiymətləndirilə bilər”.

Bu sözləri Rəşad Bayramov Xalqcebhesi.az-a açıqlaması zamanı deyib.

O qeyd edib ki, bu yanaşma bir neçə siyasi və strateji məqsədə xidmət edir:
“Əvvəla, Kremlin media və ictimaiyyət üçün detalları açıqlamaması onun strateji mövqeyini qorumaq istəyi ilə bağlıdır. Qapalı format Moskvanın istənilən məqamda taktiki çevikliklə hərəkət etməsinə imkan yaradır və tərəflərin planlarını ifşa etmədən sülh təkliflərini və güzəştləri erkən mərhələdə formalaşdırmasına şərait yaradır.
Digər tərəfdən, belə qapalı diplomatiya Rusiya üçün daxili siyasi üstünlük də təmin edir. Münaqişənin həllində aktiv rol oynadığını göstərmək Kremlin daxili auditoriyası qarşısında nüfuzunu gücləndirir və xarici tərəflərə strateji mesaj verir. Yəni Rusiya göstərmək istəyir ki, danışıqların vaxtı və məzmunu məhz onun strateji planına uyğun seçilir”.

Politoloqun sözlərinə görə, danışıqların vaxtı və məkanının açıqlanmaması həm kompromis imkanlarını medianın təzyiqi olmadan müzakirə etməyə şərait yaratsa da, digər tərəfdən güvən məsələsi üçün risk yaradır. Xüsusilə Ukrayna və Qərb tərəfdaşları üçün şəffaflıq mexanizmlərinin olmaması sülh prosesində kritik əhəmiyyət daşıyır:
“Ümumilikdə deyə bilərik ki, Kremlin bu qapalı diplomatiya taktikası taktiki çevikliyi və strateji üstünlüyü qoruyur, daxili auditoriya üçün güc simvolu yaradır və xarici tərəflər qarşısında manevr imkanlarını genişləndirir. Lakin uzunmüddətli perspektivdə sülh prosesinin şəffaflıq və güvən mexanizmlərinə bağlı olduğunu nəzərə alanda müəyyən çətinliklər də meydana çıxır”.

Günel Elxan