Azərbaycan prezidenti İlham Əliyevin 2010-cu ildə Vaşinqtonda baş tutan nüvə təhlükəsizliyi sammitinə dəvət edilməməsi Ağ Evin diqqətsizliyi ilə bağlı olub.
Bu barədə məşhur diplomat, ABŞ Azərbaycandakı sabiq səfiri Metyu Brayza `Vestnik Kafkaza`-ya açıqlamasında bildirib.
"Deyə bilərəm ki, ABŞ Obamanın nüvə təhlükəsizliyi ilə əlaqədar ilk sammitinə prezident İlham Əliyevi dəvət etməməklə böyük səhv etmişdi. Həmin vaxt sammitə Gürcüstan və Ermənistan prezidentləri dəvət olunmuşdu. Bu diplomatik yanlışlıq Ağ Evin diqqətsiz işinin nəticəsi idi", - deyə Brayza qeyd edib.
Xatırladaq ki, Azərbaycan Prezidenti Administrasiyasının rəhbərinin müavini, qurumun Xarici əlaqələr şöbəsinin müdiri Novruz Məmmədov ABŞ prezidenti Barak Obama tərəfindən prezident İlham Əliyevin bu il Vaşinqtonda keçiriləcək IV Nüvə Təhlükəsizliyi Sammitinə dəvət olunduğunu bəyan edib.
Novruz Məmmədov qeyd edib ki, bu dəvəti ABŞ prezidenti Barak Obama Prezident İlham Əliyevə yazdığı məktubda edib.