"İran, Rusiya və Türkiyə tərəfi ABŞ-ı Astanda yanvarın 23-də keçiriləcək Suriya danışıqlarında iştiraka dəvət etməyib".
Bunu İran Ali Milli Təhlükəsizlik Şurasının katibi Əli Şəmxani deyib. O bildirib ki, ABŞ-ın Astanada keçiriləcək görüşdə iştirakı gözlənilmir: "Ehtimal olunur ki, ev sahibi olan ölkə bu dövləti müşahidəçi kimi iclasa dəvət etsin, lakin əminliklə deyə bilərik ki, Amerika Astana danışıqlarında, danışıqların nəticələrinin əldə olunmasında heç bir rol oynamayacaq".
Əli Şəmxani qeyd edib ki, Astana görüşünə atəşkəs sazişini imzalamış və suriyalı-suriyalı formatı üzrə öhdəlik götürmüş silahlı qruplaşmaların nümayəndələri qatılacaq. BMT-nin nümayəndəsi də danışıqlara dəvət olunub.
Əli Şəmxaninin sözlərinə görə, İran terrorizmlə mübarizədə Suriyanın qanuni hökumətini dəstəkləyən əsas ölkə kimi siyasi proseslərdə daha fəal iştirak edəcək.
Qeyd edək ki, İran, Türkiyə və Rusiyanın iştirakı ilə yanvarın 23-24-də Astanada Suriya ilə bağlı danışıqlar keçiriləcək.