“Məruzəçilərə idarəetmə hesabatını təqdim etdiklərinə görə təşəkkür etmək və Şərq Tərəfdaşlığı gündəliyinin yeni sahələri, Şərq Tərəfdaşlığı ölkələrinin əsas prinsiplərə əməl etməyə mane olan problemləri həll etmək üçün istifadə etməli olduqları yeni alətlər üzrə tövsiyələri özündə əks etdirən yaxşı hazırlanmış sənədi qeyd etmək istərdim".

APA xəbər verir ki, bunu bunu İrəvanda AVRONEST Parlament Assambleyasında iştirak edən Azərbaycan parlamentinin deputatı Soltan Məmmədov deyib.
Deputat bildirib ki, hesabatın 12 bəndində islahatların idarə edilməsinin təkmilləşdirilməsi üçün bütün alətlər və tapşırıqlar, həmçinin Şərq Tərəfdaşlığı ölkələrinin bu istiqamətdə əldə etdiyi nailiyyətlər vurğulanır: “Azərbaycan Respublikası Prezidentinin Fərmanı ilə təsdiq edilmiş Açıq Hökumətin təşviqinə dair 2020-2022-ci illər üçün Milli Fəaliyyət Planının uğurla icrası barədə məlumat vermək istərdim. Bu 13 səhifəlik fəaliyyət planı korrupsiyaya qarşı mübarizə, şəffaflığın artırılması, qrant və QHT qeydiyyatının sadələşdirilməsi, çirkli pulların yuyulmasına qarşı mübarizə üzrə qanunvericiliyin sadələşdirilməsi, dövlət xidmətlərinin təkmilləşdirilməsi, vətəndaş cəmiyyəti təşkilatlarından ibarət İctimai Şuraların fəaliyyətinin səmərəliliyinin artırılması kimi sahələrdə birgə hazırlanmış öhdəlikləri əhatə edir.

11 dövlət təşkilatı tərəfindən 140 xidmət, 30 özəl təşkilat tərəfindən 180 xidmət göstərən və Birləşmiş Millətlər Təşkilatının Dövlət Xidmətləri Forumu tərəfindən mükafatlandırılan Azərbaycan Xidmət və Qiymətləndirmə Şəbəkəsi (ASAN) adlı dövlət-özəl tərəfdaşlıq proqramı həyata keçirmək üçün ən yaxşı vasitələrdən biridir. ASAN vətəndaşlara yaxşı idarəetmənin səkkiz xüsusiyyəti ilə xidmət edir: qanunun aliliyi, bərabərlik və inklüzivlik, iştirak, istehlakçı yönümlülük, hesabatlılıq, məsuliyyətlilik, şəffaflıq, effektivlik və səmərəlilik. Orada 2 000 gənc işləyir və “bir pəncərə” yanaşması ilə gündəlik 31 000 müraciəti emal edilir”.

Deputat diqqətə çatdırıb ki, sosial xidmətlərin idarə edilməsi sistemində digər islahat 2018-ci ildə dövlət sosial xidmətlərini vaxtında, şəffaf, müasir və innovativ şəkildə həyata keçirən DOST Agentliyinin yaradılmasıdır: “Dövlət idarəçiliyində idarəetmənin təkmilləşdirilməsinə birbaşa təsir edən bu islahatlar haqqında sizə məlumat verərək, sizə müraciət edirəm və Şərq Tərəfdaşlığı ölkələrinin əldə etdiyi irəliləyişləri tamamlamaqla 5-ci bəndə cüzi əlavələr etməyə çağırıram. 5-ci bəndə aşağıdakı cümlənin əlavə edilməsini təklif edirik: “AVRONEST PA Azərbaycanda Açıq Hökumətin Təşviqi üzrə 2020-2022-ci illər üçün Milli Fəaliyyət Planının vətəndaş cəmiyyəti təşkilatları ilə sıx əməkdaşlıq şəraitində uğurla davam etdirilməsini alqışlayır”.