İran futbol federasiyasının başçısı Mehdi Tac "Traxtur" klubundan üzr istəyib.

Gunaz.tv

Bu barədə İran mediası məlumat yayıb.

O, 2015-ci ilin mayında İran futbol çempionatının final oyunu zamanı “Traxtur” komandasının çempion olmasına mane olunduğunu etiraf edib.

Qeyd edək ki, həmin il son tur ərəfəsində turnir cədvəlinə başçılıq edən "Traxtur" ilə Tehranın “Neft” klubunun oyunu 3-3 hesabı ilə başa çatmışdı.

Qarşılaşmanın son dəqiqələrində verilən yalan məlumat nəticəsində Təbriz təmsilçisi özünü çempion hesab edərək oyunu sadəcə nəticəni qoruyaraq başa çatdırmağa çalışmışdı.

Verilən yalan məlumat eyni dəqiqələrdə keçirilən “Saypa” və “Sepahan” komandaları arasındakı qarşılaşmanın nəticəsi ilə bağlı idi. “Saypa”nı 2-0 hesabı ilə məğlub edən “Sepahan” İran çempionu olmuşdu.

Həmin gün "Traxtur-"Neft" oyunun keçirildiyi standionda internet və telefon şəbəkəsi kəsilmiş, hakimlər "Traxtur" komandasının əlehinə qərəzli səhv qərarlar vermişdilər.

Təbriz təmsilçisinin çemionluğunun qarşısını almaq üçün atılan bu addımlar konspirasiya kimi dəyərləndirilir.