“Avropa İttifaqı Şurasının 2015-ci ildə dayandırılmış bəzi sanksiyaları yenidən tətbiq etməsi İranın nüvə proqramında “əhəmiyyətli öhdəlik pozuntuları” ilə əsaslandırılır. “Snapback” mexanizminin işə salınması Avropanın beynəlxalq hüquq çərçivəsində hərəkət etdiyini göstərsə də, siyasi nəticələri hüquqi tərəflərindən daha çox diqqət çəkir”.

Bu fikirləri “Xalq Cəbhəsi”nə açıqlamasında politoloq Elman Telmanoğlu söyləyib.

Politoloq qeyd edib ki, bu addım Avropanın qlobal təhlükəsizlik məsələlərində nüfuzunu qorumaq niyyətini əks etdirir: “ABŞ-nin 2018-ci ildə JCPOA-dan (Joint Comprehensive Plan of Action, Ümumi Hərtərəfli Fəaliyyət Planı) çıxmasından sonra Avropa tərəfi öz mövqeyini balanslı saxlamışdı. İndi isə sərt qərarla Qərbin vahid mövqeyinə yaxınlaşır, İranı diplomatik masaya qaytarmaq üçün təzyiq vasitəsi yaradır”.

O əlavə edib ki, belə bir qərarın region üçün nəticələri kifayət qədər mürəkkəbdir: “Sanksiyaların bərpası İranı iqtisadi cəhətdən zəiflədə bilər, lakin bu, eyni zamanda onun Rusiyaya və Çinə daha çox yönəlməsini stimullaşdırır. Nəticədə, Qərbin təcridetmə siyasəti yeni güc bloklarının formalaşmasına yol aça bilər. Bundan əlavə, enerji bazarlarında qeyri-sabitlik ehtimalı artır, xüsusilə Avropa və qonşu region ölkələri üçün risklər yaranır”.

Röya İsrafilova