“Elm adamlarının sosial durumu yaxşılaşdırılmalıdır” Gündəm

“Elm adamlarının sosial durumu yaxşılaşdırılmalıdır”

“Ədəbiyyat qəzeti”, “Ulduz”, “Azərbaycan” və “Qobustan” jurnalları hələ də 1997-ci ilin büdcəsi ilə fəaliyyət göstərir

Xalqcəbhəsi.az xəbər verir ki, bunu Milli Məclisin Mədəniyyət komitəsinin üzvü, deputat Elnarə Akimova parlamentin bugünkü plenar iclasında “Azərbaycan Respublikasının 2027-ci il dövlət büdcəsi haqqında” qanun layihəsinin birinci oxunuşda müzakirəsi zamanı deyib.

Deputat çıxışında elm, mətbuat və mədəniyyət sahələrinin maliyyələşdirilməsi ilə bağlı bir sıra vacib məqamlara toxunub:
Madde işareti Alimlərin sosial rifahı: E.Akimova bildirib ki, insanları elmə təşviq etmək və gənc elmi potensialın dünyanın aparıcı elm mərkəzlərinə inteqrasiyasını gücləndirmək üçün ilk növbədə alimlərin maddi durumu nəzərə alınmalıdır. O, 2027-ci ilin büdcə layihəsində elm adamlarının sosial-iqtisadi rifahının diqqətdən kənarda qalmayacağına inandığını vurğulayıb.
Madde işareti Ədəbi mətbuatın maliyyələşdirilməsi: Deputat 1997-ci ildə Ulu Öndər Heydər Əliyevin sərəncamı ilə dövlət büdcəsindən maliyyələşdirilməyə başlanan “Ədəbiyyat qəzeti”, “Ulduz”, “Azərbaycan” və “Qobustan” jurnallarının hələ də həmin dövrdə müəyyənləşmiş büdcə ilə fəaliyyət göstərdiyini diqqətə çatdırıb. O, iqtisadi inkişafa uyğun olaraq bu mətbu orqanlara ayrılan vəsaitin artırılmasını təklif edib.
Madde işareti Bölgələrdə və Hacı Zeynalabdin qəsəbəsində mədəniyyət mərkəzləri: Paytaxtla yanaşı, regionlarda da müasir kitabxanaların və mədəniyyət ocaqlarının yaradılmasının zəruri olduğunu deyən E.Akimova, təxminən 40 min sakini olan Sumqayıt şəhəri, Hacı Zeynalabdin qəsəbəsində modern mədəniyyət mərkəzinin təsis olunmasını xahiş edib. Deputat bunun gənclərin zərərli vərdişlərdən uzaqlaşaraq mədəni mühitə köklənməsinə güclü təkan verəcəyini qeyd edib.
E.Akimova həmçinin ötənilki büdcə müzakirələrində qaldırdığı məsələnin həllini tapdığını — "Sağlam məhəllə" layihəsi çərçivəsində Hacı Zeynalabdin qəsəbəsində yeni idman zonasının istifadəyə verildiyini xatırladaraq, buna görə Prezident İlham Əliyevə və Gənclər və İdman Nazirliyinə təşəkkürünü bildirib.
Deputat çıxışının sonunda ölkənin tərəqqisinə xidmət edən 2027-ci ilin büdcə zərfini dəstəklədiyini bəyan edib.

Günel Elxan