“İnsanları küçələrə çağıran şəxsin və təşkilatın ilk növbədə buna mənəvi haqq olmalıdır. Sual olunur: birincisi, 30 ildən çox müddətdə millətimizin arzusu olan torpaqlarımızın işğaldan azad edilməsi uğrunda aparılan müqəddəs Vətən müharibəsinə, Xankəndidə bayrağımızın ucaldılmasına laqeyd qalanların, düşmənin qovulmasına görə Azərbaycan millətini və rəhbərini təbrik etməyənlərin mitinq çağırmağa mənəvi haqqı varmı? Cavab: Yoxdur!”. Xalqcəbhəsi.az xəbər verir ki, bunu millət vəkili Musa Qasımlı qeyd edib: “İkincisi, ölkədə bütün səylərin Qarabağ və Şərqi Zəngəzur iqtisadi rayonlarının dirçəldilməsinə yönəldiyi bir vaxtda insanların diqqətini yayındırmağa cəhd göstərmək səyləri kimin, hansı ölkələrin maraqlarına xidmət edir? Cavab:Azərbaycanın düşmənlərinin, ilk növbədə Ermənistan və Fransanın! Üçüncüsü, insanları mitinqə səsləyənlərin düşüncə, fikir mübarizəsində uduzacaqlarını əvvəlcədən bilərək bunu əzələlərin toqquşmasına yönəltmək niyyətləri yoxdurmu? Cavab:Tarixən yalnız intellektual, düşüncə, fikir mübarizəsində məğlub olacaqlarını bilənlər zorakılığa, qarışıqlıq yaratmağa çalışıblar. İndiki mitinq çağırışları da bunu göstərir. Dördüncüsü, mitinqə çağıranlar millətimiz üçün hansı yolu üstün görürlər: qarşıdurma, yoxsa islahatlar yolunu? Cavab:Qarşıdurma yolunu. Bu yolu millətimiz çoxdan tarixin zibilliyinə atıb. Nəhayət, millətimiz mitinqə çağıranların ardınca gedəcəkmi? Cavab: Getməyəcək! Çünki millət onun xəyallarını gerçəkləşdirən, üstündəki ləkəni silən, yüzilliklərin problemini kökündən kəsib atan Rəhbərinin ardınca gedir. Doğru yol budur!”.