XİN AMEA ilə birgə beynəlxalq konfrans keçirib

Dünən ADA Universitetində Azərbaycan Xalq Cümhuriyyətinin qurucularından olan Əlimərdan bəy Topçubaşovun 150 illik yubileyinə həsr olunmuş beynəlxalq konfrans keçirilib.
APA-nın məlumatına görə, tədbirdə xarici işlər naziri Elmar Məmmədyarov, Milli Məclisin sədri Oqtay Əsədov, AMEA prezidenti Akif Əlizadə, diplomatlar, millət vəkilləri iştirak ediblər.
ADA Universitetinin rektoru, xarici işlər nazirinin müavini Hafiz Paşayev qeyd edib ki, Azərbaycan prezidenti İlham Əliyevin sərəncamı ilə dövlət xadimi Əlimərdan bəy Topçubaşovun yubileyi qeyd olunur: "Keşməkeşli bir dövrdə yaşamış və fəaliyyət göstərmiş Topçubaşov Azərbaycan tək Azərbaycan xalqının deyil, Rusiya imperiyasında yaşayan bütün müsəlman xalqların sevimlisinə çevrildi. İnanıram ki, Azərbaycan XİN və AMEA-nın birgə keçirdiyi beynəlxalq konfrans Topçubaşov irsinin öyrənilməsinə öz töhfəsini verəcək".
Milli Məclisin sədri Oqtay Əsədov qeyd edib ki, Azərbaycan Xalq Cümhuriyyətinin banilərindən biri olmuş Ə.Topçubaşov XX yüzilliyin əvvəllərində Məhəmməd Əmin Rəsulzadə, Nəsib bəy Yusifbəyli, Səməd bəy Mehmandarov və digərləri ilə birgə Azərbaycan Xalq Cümhuriyyətinin yaradılmasında mühüm rol oynayıb.
Topçubaşovun həyat və fəaliyyəti barədə danışan spiker O.Əsədov bildirib ki, 1918-ci il dekabrın 7-də Azərbaycan Xalq Cümhuriyyətinin ilk parlamenti Bakıda işə başlayıb. Topçubaşov bu parlamentin ilk sədri olub".
O.Əsədov Topçubaşovun Paris sülh konfransında Azərbaycanı təmsil etməsi, həmin konfransda onun başçılıq etdiyi heyətin Azərbaycanın dövlət kimi tanınmasında gərgin əmək sərf etdiyin vurğulayıb. Spiker qeyd edib ki, Azərbaycanın birinci xanımı, Heydər Əliyev Fondunun prezidenti Mehriban Əliyevanın təşəbbüsü ilə Parisdə Topçubaşovun məzarı üzərində abidəsi qoyulub.
Xarici işlər naziri Elmar Məmmədyarov çıxışında Ə.Topçubaşovun diplomatik fəaliyyətindən danışıb: "Topçubaşovun təməlini qoyduğu Azərbaycan o zaman Millətlər Məclisinə üzv ola bilməsə də, 100 il keçməmiş Azərbaycan BMT-yə üzv oldu, hətta BMT Təhlükəsizlik Şurasına rəhbərlik etdi. Topçubaşov Azərbaycan tanıtmağa başladı və biz eyni əsrdə Azərbaycanın müstəqilliyin təkrar əldə etdik və qoruduq".
Tədbirdə çıxış edən AMEA prezidenti Akif Əlizadə Topçubaşovun həyat yolunun tədqiq edilməsinə ehtiyac olduğunu deyib.