Azərbaycanla Şimali Makedoniya Respublikası arasında əməkdaşlığın intensiv inkişafı hər iki ölkə və xalqlar arasında dostluq münasibətlərinin möhkəmlənməsinə xidmət edir.

Bunu Avrasiya.net-ə Makedoniya parlamentinin deputatı, Makedoniya-Azərbaycan Dostluq Cəmiyyəti sədri Enes İbrahim Şimali Makedoniya Prezidenti Qordana Silyanovska-Davkovanın Azərbaycana səfərinə münasibətində deyib.

O, vurğulayıb ki, Şimali Makedoniya Prezidentinin qısa müddətdən sonra Azərbaycana ikinci dəfə səfər etməsi ölkələrimiz arasında çoxtərəfli əlaqələrin daha da genişləndirilməsinə ciddi təkan verəcək: "Xüsusilə də enerji sahəsindəki əməkdaşlıq, ötən ildən Şimali Makidoniyaya qaz ixracı, turizm, təhsil, mədəniyyət və digər sahələrdə əməkdaşlıq yeni imkanların açılması deməkdir. Xalqlar arasında humanitar əməkdaşlıq da iki ölkə arasında əlaqələrin mühüm istiqamətlərindən biridir".

E.İbrahim onu da əlavə edib ki, iki ölkə arasında bütün sahələrdə - siyasi, iqtisadi, enerji və humanitar sahələrdə əməkdaşlıq, münasibətlərin möhkəmlənməsi, qarşılıqlı inam və etimad iki ölkənin xalqlarının rifahı və regionda sabitliyin təmin edilməsi baxımından əhəmiyyətlidir. Gələcəkdə bu əlaqələrin daha da möhkəmləndirilməsi və yeni sahələrdə əməkdaşlığın genişləndirilməsi gözlənilir.