Rövşən Dəmirli: "Burada daha bir siyasi çalar da var"

"Nərgiz Yaqublunun 40 mərasimində İsa Qəmbər və Arif Hacılının dəstəsi də iştirak edirdi". Bu fikirləri sabiq müsavatçı, partiyanın Suraxanı rayon təşkilatının keçmiş sədri, hazırda siyasi fəaliyyətini Azərbaycan Demokratiya və Rifah Hərəkatında (ADR) davam etdirən Rövşən Dəmirli başqan müavini Tofiq Yaqublunun qızı Nərgiz Yaqublunun vəfatının 40-cı günü tamam olmamış İsa Qəmbərin öz övladına toy mərasimi təşkil etməsinə münasibətini bildirərkən deyib.
Rövşən Dəmirli bu məsələdə həm İsa Qəmbəri, həm də indiki başqan Arif Hacılını, eləcə də toy mərasimində iştirak edən digər Müsavat funksionerlərini sərt şəkildə qınayaraq bildirib ki, məhz bu olaydan sonra əsas müzakirə obyekti İsa Qəmbər və oğlunun toyu oldu: "Belə ki, ən azından İsa Qəmbər öz müavini olmuş Tofiq Yaqublunun qızının ruhuna hörmətlə yanaşmalı idi. Amma təəssüf olsun ki, o bunu etmədi".
Onun sözlərinə görə, burada daha bir siyasi çalar da var: "Tofiq Yaqublu əvvəl İsa Qəmbərin müavini olub, hazırda isə Arif Hacılının müavinidir. İndiki durumda Tofiq bəyə dəstək olmaq əvəzinə bu cür hərərəkət yolverilməzdir. Çünki İsa Qəmbərin siyasi fəaliyyətində bu insanın danılmaz rolu var. Əfsuslar olsun ki, İsa Qəmbər bu amili dəyərləndirə bilmədi. İstər İsa Qəmbər, istərsə də Arif Hacılı olsun, onların hər ikisi bu cür hörmətsiz davranışları ilə daha sübut etdilər ki, insanlara dəyər vermək qabiliyyətləri çox zəifdir. Əminəm ki, Tofiq Yaqublu da yaxın günlərdə öz mövqeyini ortaya qoyacaq".
Rövşən Dəmirli daha bir xatırlatma edərək onu da bildirib ki, hələ Nərgiz Yaqublunun vəfatından bir neçə gün əvvəl müsavatçı Mahmud Şirəli oğluna toy edirdi və dəvətnamələri paylamışdı: "Beləliklə, İsa Qəmbər o toyda iştirak etmədi. Səbəbini də Nərgizin vəfatı ilə əlaqələndirdi. Bu addımı atan insan, guya Nərgizə görə yas saxladığını sərgiləyən İsa Qəmbər nəyə görə, mərhumənin 40-ı çıxmamış öz oğlun toy etdi? Məgər o, bunu bir neçə gün təxirə sala bilməzdimi? Məhz buradan da açıq görünür ki, bu insanlar hazırkı günə qədər olan siyasi fəaliyyətlərində həmişə qeyri-səmimi olublar. Müsavatçılar bu adamın müxtəlif manevrlərinə inanıblar. Sonuc olaraq isə partiya bu cür qeyri-səmimiliklər, yalanlar və siyasi dividentlər səbəbindən mövcud vəziyyətə qədər çatıb".

Əli