Güney Azərbaycanın siyasi mərkəzinin bütün istiqamətlərdə gerilədiyini hətta ölkə rəsmiləri də etiraf edir

"Təəssüflər olsun ki, böyük şəhərlərə dövlət büdcəsindən bir rial belə ayrılmır və bu şəhərlərdə bəldiyyələr öz büdcələrini şəhər əhalisi hesabına əldə edirlər". Bu sözləri Təbrizin Şəhər Şurasının İdarə Heyətinin üzvü Rəsul Dərsxan dilə gətirib.
Rəsul Dərsxan Təbrizin 7-ci məntəqəsinin bələdiyyəsində keçirilən iclasda deyib: "Böyük şəhərlərdə əhalinin dövlət büdcəsindən bir rial belə almaması və şəhərin bütün xərclərinin şəhər əhalisi üzərində olması ədalətdən kənardır. Vətəndaşların əksəriyyəti böyük şəhərlərdə yaşayır, onlar çətinliklə gəlir əldə edirlər. Dövlətin bu şəhərlərin bələdiyyəsinə yardım etməməsinin heç bir qanedici izahı yoxdur".
R.Dərsxan əlavə edib ki, Təbriz yaxın keçmişdə ölkənin ikinci şəhəri idi, indi 7-ci və 8-ci yerdədir. Onun fikrincə, bu faktın özü ölkədə ədalətə riayət edilməməsini göstərir.
Qeyd edək ki, Təbriz həm də vaxtı ilə bir çox sahədə "birincilər şəhəri" adlanardı. İndi bu şəhər nəinki təkcə iqtisadi baxımdan deyil, hətta təhsil sahəsində də böyük tənəzzülə uğrayıb. Güney Azərbaycanın siyasi mərkəzinin bütün istiqamətlərdə gerilədiyini hətta ölkə rəsmiləri, xüsusi ilə yerli məsullar da etiraf edir.