"Bir ay ərzində - iyunun 10-dan iyulun 10-na qədər DİM təxminən 143 min insan üçün imtahan təşkil edib və bu imtahanlar karantin rejimində olub".

APA-nın məlumatına görə, bunu onlayn mətbuat konfransında Dövlət İmtahan Mərkəzinin Direktorlar Şurasının sədri Məleykə Abbaszadə bildirib.

Onun sözlərinə görə, onlardan 120 min insanın nəticələri məlumdur, digər imtahan nəticələri də elan olunacaq:

"Növbəti həftə üçün sərt karantin rejimi olan bölgələrdə imtahan keçirmək üçün icazə almışıq. Hər imtahanda təxminən 15 min insan imtahana cəlb olunacaq, bu da insan sıxlığını müəyyən dərəcədə azaltmaq üçündür. Bu, çox prosesdir. Hər kəs üçün yer müəyyən olunmalıdır. 3822 nəfər müəyyən səbəblərə görə imtahanlarda iştirak etməyib, onlar arasında da ali təhsil və orta ixtisas müəssisələrində imtahan vermək üçün təkrar müraciət edənlər var. Onlar səhhətində olan problemlərə görə qoşulmayıb, onların karantində olub olmadığı, sağaldığı, hamısı yoxlanılıb. Çalışırıq ki, hər kəs olduğu yer üzrə imtahan versin. Biz 2 gün ərzində bütün cədvəlləri elan edəcəyik. Bu ay nəzərdə tutulan 4 imtahan Bakının rayonları, Sumqayıt və Abşeron üzrə olacaq. Həmin cədvəllər sabah və ya biri gün DİM-in saytında olacaq".