İraq KİV-ləri Ermənistanın təcavüzkar siyasətindən yazır Siyasət

İraq KİV-ləri Ermənistanın təcavüzkar siyasətindən yazır

Ermənistanın növbəti hərbi təxribatları İraq mətbuatının diqqətindədir.

AZƏRTAC xəbər verir ki, İraqın bir neçə saytı məsələyə münasibət bildirərək yazıb ki, Ermənistan daxili gərginliyi azaltmaq məqsədi ilə Azərbaycana yenidən təcavüz edib.

Qeyd olunub ki, təcavüzkar siyasətini ölkənin təhlükəsizlik strategiyasında əks etdirən Ermənistan münaqişənin nəticələrini aradan qaldırmaq, işğalçı qüvvələrini Azərbaycanın beynəlxalq səviyyədə tanınmış ərazilərindən çıxarmaq əvəzinə, yeni mövqelər ələ keçirmək, gərginliyi artırmaq istəyir. Ermənistan bu kimi təxribatçı əməlləri ilə üçüncü ölkələri Ermənistan-Azərbaycan münaqişəsinə cəlb etməyə çalışır. Lakin beynəlxalq ictimaiyyətin Ermənistanın təcavüzkar siyasəti ilə bağlı tutduğu mövqe hamıya bəlidir.

Baş vermiş hadisə ilə bağlı Azərbaycan Respublikasının Prezidenti İlham Əliyev Təhlükəsizlik Şurasının iclasını keçirib və bildirib ki, gərginliyin artmasına görə bütün məsuliyyət Ermənistan rəhbərliyinin üzərinə düşür.