Azərbaycanın təklifi ATƏT PA-nın gündəliyinə salınmadı

ATƏT PA-nın Bakıda keçiriləcək 23-cü yay sessiyasında ATƏT-in Minsk qrupunun Dağlıq Qarabağ münaqişəsinin həlli barədə fəaliyyətinə dair hesabat verməsi ilə bağlı Azərbaycan tərəfinin təklifi gündəliyə salınmayıb.
Bunu APA-ya açıqlamasında Milli Məclisin sədr müavini, Azərbaycanın ATƏT PA-dakı nümayəndə heyətinin rəhbəri Bahar Muradova deyib. O bildirib ki, sessiyanın gündəliyinə müdaxilə edilməsinin müvafiq proseduru var və təklif də prosedura uyğun şəkildə olmalıdır: "ATƏT PA-nın Bakıda keçiriləcək yay sessiyasında bizim təklifimiz gündəliyə salınmayacaq. Çünki artıq bu sessiyanın gündəliyi təsdiq olunub. Amma ola bilsin ki, sonrakı sessiyalarda təklifin gündəliyə salınması mümkün olsun, çünki biz hazırda bunun üzərində işləyirik".
B. Muradova əlavə edib ki, buna baxmayaraq, həlli uzanan münaqişələr məsələsinin müzakirə olunması gözlənilir.
Qeyd edək ki, Milli Məclisin son iclasında spiker Oqtay Əsədov ATƏT PA-nın Bakıda keçiriləcək 23-cü yay sessiyasında Minsk qrupunun fəaliyyəti ilə bağlı hesabatın dinlənilməsi təklifini irəli sürüb və bununla bağlı Azərbaycanın ATƏT PA-dakı nümayəndə heyətinə müvafiq tapşırıq verib.