Dərnəgül deposunun tikintisi metropolitendə xətlərin ayrılması çərçivəsində aparılır.

"APA-Economics" xəbər verir ki, bunu “Bakı Metropoliteni” QSC-nin baş mühəndisi Namiq Yusubov jurnalistlərə açıqlamasında bildirib.

"Bildiyiniz kimi, Bakı metropolitenində xüsusi əhəmiyyət kəsb edən bir böyük bir layihənin icrası, hal-hazırda icrasına start verilib. Bu layihənin əsas mahiyyəti xətlərin ayrılmasından ibarətdir. Belə ki, bundan sonra yaşıl və qırmızı xətlərin ayrılması prosesinin icrası həyata keçiriləcək", - Namiq Yusubov bildirib.

Onun sözlərinə görə, xətləri ayırmaq üçün hər bir xəttin, yəni qeyd etdiyimiz yaşıl və qırmızı xətlərin müstəqil şəkildə fəaliyyət göstərən deposu olmalıdır. Bununla da bağlı layihənin icrasına məhəlli şəkildə başlanılıb.

"İlkin olaraq Dərnəgül deposunun tikintisinə start verildi və bununla da əlaqədar olaraq ümumilikdə 25 qanovdan hal-hazırda 12 qanov istismara verilib ki, burada qatarların, yaşıl xətt üzrə gedəcək qatarlarıni baxışı, gündəlik istismarı təşkil olunması üçün şərait yaradılsın", - baş mühəndis qeyd edib.