"Azərbaycan Respublikasının Prezidenti İlham Əliyev və birinci xanım Mehriban Əliyevanın Naxçıvan Muxtar Respublikasına tarixi səfəri Cənubi Qafqazda sürətlə dəyişən geosiyasi reallıqlar fonında müstəsna strateji əhəmiyyət kəsb edərək regionun gələcək inkişaf trayektoriyasını müəyyənləşdirir."

Xalqcebhesi.az xəbər verir ki, bunu deputat Kamran Bayramov deyib.

Onun sözlərinə görə, uzun illər boyunca Ermənistan-Azərbaycan münaqişəsinin ön cəbhəsi və müdafiə istehkamı kimi qəbul edilən Naxçıvan, 2025-ci il Vaşinqton razılaşmalarından sonra regional kommunikasiyaların açılması perspektivi ilə təcrid olunmuş eksklav statusundan Cənubi Qafqazın mühüm nəqliyyat-logistika qovşağına çevrilmək imkanı qazanır. Səfər çərçivəsində Naxçıvandakı 188 kilometrlik dəmir yolu infrastrukturu bərpasının diqqət mərkəzində saxlanılması, illik buraxılış qabiliyyətinin 15 milyon tona çatdırılması hədəfi və Ordubadın Salamməlik stansiyasında işlərə başlanılması Azərbaycanın əsas ərazisi ilə birbaşa əlaqənin bərpasına yönəlmiş praktiki addımların bariz göstəricisidir.

K.Bayramov qeyd edib ki, Mehri və Ordubad vasitəsilə Muxtar Respublikaya daxil olacaq bu nəqliyyat marşrutu Culfadan İrana, köhnə sovet xətti ilə Ermənistana və Sədərək-Dilucu istiqamətində Türkiyəyə uzanan üç strateji şaxəyə ayrılır. Xüsusilə Qars–Iğdır–Aralık–Dilucu xəttinin inşası tamamlandıqdan sonra Naxçıvan tarixində ilk dəfə Türkiyə ilə birbaşa dəmir yolu əlaqəsinə yiyələnərək böyük həcmdə yük və sərnişin axınını qəbul etməyə hazırlaşır. Nəqliyyat dəhlizlərinin açılması ilə yanaşı, investisiyaların və istehsalın cəlb edilməsi məqsədilə təməli qoyulan 310 hektarlıq Naxçıvan Sənaye Parkı qida, kimya, maşınqayırma, tekstil və bərpa olunan enerji sahələrində fəaliyyət göstərərək regional və xarici bazarlara çıxış imkanı əldə edəcəkdir. Paralel olaraq, “Şəms 1” və “Qərbi Üfüq” günəş elektrik stansiyalarının inkişafı, regionun zəngin günəş enerjisi potensialından istifadə etməklə gələcək sənaye müəssisələrinin təchizatına və yaşıl enerjiyə keçidə xidmət edir. Dövlət sosial xidmətlərini “tək pəncərə” prinsipi ilə təqdim edən birinci Naxçıvan Regional DOST Mərkəzinin fəaliyyətə başlaması əhalinin sosial rifahının yüksəldilməsinə töhfə verir.

Deputat əlavə edib ki, Naxçıvanın Ermənistan, İran və Türkiyə ilə həmsərhəd olan həssas coğrafi mövqeyi nəzərə alınaraq, Əlahiddə Ümumqoşun Ordusunun hərbi hissəsinə baxış zamanı nümayiş olunan yüksək müdafiə potensialı təhlükəsizliyin hər zaman başlıca prioritet olaraq qaldığını təsdiqləyir. Onilliklər ərzində coğrafi təcrid və mühasirədən əziyyət çəkən Naxçıvan, dövlət başçısının vurğuladığı kimi, yeni iqtisadi fəallıq, əlavə iş yerləri və açılan kommunikasiyalar sayəsində öz coğrafiyasını üstünlüyə çevirərək regionun əvəzolunmaz nəqliyyat habına çevrilmək üçün tarixi bir şans əldə edir.

Cavid