Sərhədyanı və dağlıq ərazilərdə yaşayan ailələr üçün yeni güzəşt Hadisə

Sərhədyanı və dağlıq ərazilərdə yaşayan ailələr üçün yeni güzəşt

Azərbaycanda mənzil şəraitinin yaxşılaşdırılması məqsədilə sərhədyanı və dağlıq ərazilərdə yaşayan ailələrə, xüsusilə gənc ailələrə güzəştli ipoteka kreditlərinin verilməsi nəzərdə tutulur.
Əmək və Əhalinin Sosial Müdafiəsi Nazirliyindən "Trend"ə verilən məlumata görə, bu, hazırda müzakirə mərhələsində olan "Azərbaycan Respublikasında əhali sakinliyi və demoqrafik inkişaf sahəsində Dövlət Proqramı (2014-2025-cı illər)" layihəsində qeyd edilib.
Layihəyə görə, ailələrin, xüsusilə üç və daha çox uşaqlı ailələrin mənzil şəraitinin yaxşılaşdırılması üçün güzəştli ipoteka kreditlərinin verilməsi şərtlərinin sadələşdirilməsi istiqamətində müvafiq tədbirlər həyata keçiriləcək.
Bundan əlavə, gənc, aztəminatlı, çoxuşaqlı və natamam ailələrin əlverişli şərtlərlə sosial təyinatlı mənzillərlə təmin olunması da planlaşdırılır.
Layihədə qeyd edilir ki, dövlət uşaq müəssisələrindən məzun olmuş valideyn himayəsindən məhrum və sağlamlıq imkanları məhdud şəxslər sosial mənzillər və ya ailə tipli yataqxanalarda yaşayış yeri ilə təmin ediləcək. Ali və orta ixtisas məktəblərinin yataqxanalarında ailəli tələbələrin ayrı otaqla təmin edilməsi planlaşdırılır.