XİN-in sabiq idarə müdirinin məhkəməsində şahidlər ifadə verib Hadisə

XİN-in sabiq idarə müdirinin məhkəməsində şahidlər ifadə verib

Bakı Ağır Cinayətlər Məhkəməsində Xarici İşlər Nazirliyinin (XİN) İşlər idarəsinin sabiq müdiri Fərhad Mollazadə, Konsulluq idarəsinin vəzifəli şəxsi Səlim Əlizadənin cinayət işi üzrə məhkəmə prosesi davam etdirilib.

Hakim Əfqan Hacıyevin sədrliyi ilə keçirilən prosesdə şahid qismində ifadə verən Asif Ağayev bildirib ki, Səlim Əlizadə ilə "Ofis Aləmi" adlı dəftərxana mallarının satışı mağazasında tanış olub: "Bizdən mallar alırdı. Malları bəzən nisiyə götürürdü. Pulunu sonradan ödəyirdi".

A.Ağayev deyib ki, Səlim Məmmədov 2020-ci ildə ondan nazirliklə müqavilə bağlamaqlarını istəyib: "Müqavilələr bağlandı. Pulu köçürmə ilə etməyə başladılar.

Səlim bir gün gəldi ki, nazir ona tapşırıq verib. Bu səbəbdən ona pul lazımdır. Mənə dedi ki, şirkətinin adına pul köçürsünlər. Mən də həmin pulu çıxarıb ona borc kimi verdim. Nazirlik tərəfindən 60 min manat pul köçürüldü. Həmin puldan 18 min manatlıq mal vermişdik. Qalan pula da illik mallar verəcəkdik. Səlim xahiş etdi ki, pulu nağdlaşdırıb ona borc kimi verim. 42 841 manat pulu nağdlaşdırıb ona borc verdim".

Şahidin istintaqa verdiyi ifadə ilə məhkəməyə verdiyi ifadə arasında ziddiyyət olduğu üçün onun ifadəsi elan olunub. İstintaqda A.Ağayev bildirib ki, tender zamanı qalib olandan sonra Xarici İşlər Nazirliyi tərəfindən 68 min manat pul köçürülüb: "Ondan 18 min manatlıq avandanlıqlar verilib. Vergilər çıxılandan sonra yerdə qalan puldan 42 841 manat pul nağlaşdırılaraq nazirliyinin əməkdaşı Səlim Məmmədova verilib.

Daha sonra şahid qismində ifadə verən Ramil Hüseynov deyib ki, dayısı arvadının adına şirkəti olub: "Salyanda dayım arvadı Sevda dializ xəstəsi idi. Mənim adımı şirkətə xəzinadar kimi yazmışdılar. İki dəfə bankdan pul götürmüşəm. Birində 129 min, digərində isə 97 min manat çıxardıb Asif adlı şəxsə vermişəm. Onun müqabilində bizə 2500 manat pul verildi. Ondan da bir qismi vergiyə ödənildi. 800 manat pul dayımın xəstəliyinə xərclənib. Bir müddət sonra şirkəti bağlatdırdıq".

Digər şahid Möhübbət Vəlişov isə bildirib ki, adına 5 şirkət açılıb: "Rəsmiyyə Qazıyevə adlı qadına etibarnamə veridik, bütün işləri o görürdü. Hər ay şirkətlərə hər birinə görə 100 manat verilirdi. Son dövrlər də pulu verməməyə başladılar. Sonradan şirkətləri geri aldım. Maraqlandım ki, xeyli vergi borcu yaranıb. Hazırda şirkətlərin ümumilikdə 8 min manat vergi borcu qalıb".

Prosesdə daha sonra şahid qismində "Ofis Aləmi" MMC-də çalışan Cabbar Cəbrayılov ifadə verib: "Səlim müəllimi tanıyırdım. Bizdən mal alırdı. Sonrada Xarici İşlər Nazirliyi ilə müqavilə bağladıq. Pulu köçürmə ilə etdilər. Digər məsələlərdən mənim xəbərim yoxdur".

Proses sentyabrın 29-da davam edəcək.

İttihama görə, təqsirləndirilən şəxslər Dövlət Təhlükəsizliyi Xidməti tərəfindən saxlanılıb, barələrində Cinayət Məcəlləsinin 179.3.2-ci (külli miqdarda mənimsəmə), 308-ci (vəzifə səlahiyyətlərindən sui-istifadə etmə), 311-ci (rüşvət alma) maddələri ilə cinayət işi başlanıb.
Səbail Rayon Məhkəməsi tərəfindən həmin şəxslər barəsində həbs qətimkan tədbiri seçilsə də, sonradan məhkəmənin qərarı ilə onların barəsində seçilmiş həbs qətimkan tədbiri ev dustaqlığı ilə əvəzlənib.