Deputat Orxan Erdem: Prezident İlham Əliyevin Türkiyəyə dəstəyini həmişəki kimi böyük rəğbətlə qarşıladıq Siyasət

Deputat Orxan Erdem: Prezident İlham Əliyevin Türkiyəyə dəstəyini həmişəki kimi böyük rəğbətlə qarşıladıq

Prezident İlham Əliyevin Yunanıstanın Azərbaycanda yeni təyin olunmuş səfirinin etimadnaməsini qəbul edərkən söylədiyi fikirlər Şərqi Aralıq dənizində baş verən proseslərə ən ədalətli yanaşmadır. Dövlət başçısının bu dəstəyi Türkiyədə böyük rəğbətlə qarşılandı. Qardaş Azərbaycan hər zaman Türkiyəni tərəddüdsüz dəstəkləyib.

Bu fikirləri AZƏRTAC-a açıqlamasında Türkiyə Böyük Millət Məclisinin deputatı Orxan Erdem söyləyib.

Deputatın sözlərinə görə, Prezident İlham Əliyev haqlı olaraq açıq şəkildə yunan səfirə dedi ki, Azərbaycan Yunanıstan, Ermənistan və Kipr arasında hərbi əməkdaşlıqdan narahatdır. Prezidentin bu sözləri Azərbaycanda olduğu kimi, Türkiyədə də dəstəkləndi. Biz də hesab edirik ki, bu hərbi əməkdaşlıq yolverilməzdir.

“Azərbaycan xalqının ümummilli lideri Heydər Əliyevin dediyi kimi, biz bir millət, iki dövlətik. Prezident İlham Əliyev hər dəfə Türkiyəni dəstəkləyən bəyanatlarla çıxış edəndə qürur hissi yaşayırıq. Bu, ölkələrimiz arasındakı qardaşlıq münasibətlərini daha da möhkəmləndirir”, - deyə deputat bildirib.