"Fitch Solutions” Azərbaycanda iqtisadi artım proqnozunu dəyişməyərək 2025-ci il üzrə 2,6%, 2026-cı il üzrə 3,2% müəyyən edib.

"APA-Economics" xəbər verir ki, bu barədə "Fitch Group"a aid olan "Fitch Solutions” (FS) şirkətinin ölkə üzrə hesabatında bildirilib. FS Azərbaycanda real ÜDM-in 2027-ci il üzrə proqnozunu isə 3,1%-dən 3,2%-ə yüksəldib.

Qeyd edilib ki, Azərbaycanda neft sektoru ÜDM-in təxminən 50%-ni təşkil etsə də, son aylarda iqtisadi artımın əsas hərəkətverici qüvvəsi qeyri-neft sektoru olub. Bununla belə, 2025 və 2026-cı illərdə Azərbaycan iqtisadiyyatı üçün artım riskləri var: “Bazar hələ də enerji ixracından əldə olunan gəlirdən asılıdır, bu isə onu qlobal neft qiymətlərinin dalğalanmalarına və potensial istehsal fasilələrinə həssas edir. Şaxələndirmə səylərinə baxmayaraq, neft-qaz sektoru hələ də Azərbaycanın xarici ticarət profisitinin əsas hissəsini təşkil edir və ixracın əhəmiyyətli bir hissəsini təşkil edir. Azərbaycanın iqtisadi sabitliyinə əsas risklər qlobal neft bazarlarındakı dalğalanmalar – regional münaqişələr və iqlim dəyişikliyinin təsiri ilə bağlı təchizat şokları kimi geosiyasi gərginliklər ola bilər”- FS əlavə edib.