"Xocalıya görə məsuliyyət daşıyan şəxslər beynəlxalq məhkəmənin qarşısına çıxarılmalıdır"

Türkiyə Böyük Millət Məclisinin (TBMM) Xarici işlər komissiyası Xocalı soyqırımının 23-cü ildönümü ilə əlaqədar bəyanatla çıxış edib. APA-nın "Cihan" agentliyinə istinadən verdiyi məlumata görə, komissiyanın Ədalət və İnkişaf (AKP), Cümhuriyyət Xalq (CHP) və Milliyyətçi Hərəkat (MHP) partiyalarının üzvləri tərəfindən imzalanan bəyanatda 1992-ci ildə Ermənistan hərbi qüvvələri tərəfindən Xocalıya hücum nəticəsində çoxlu sayda insanın öldürüldüyü, yaralandığı və əsir götürüldüyün bildirilir:
"Türkiyə olaraq, azərbaycanlı qardaşlarımızın bundan 23 il əvvəl Xocalıda məruz qaldıqları amansız hücum və qətliamı hər zaman qəlbimizin ən dərinlərində hiss edir, bu acını ən səmimi duyğularımızsa bölüşürük. Ermənistan Respublikası hərbi qüvvələri tərəfindən gerçəkləşdirilən bu qətliamı və Azərbaycan torpaqlarının illərdən bəri davam edən işğalını qınayırıq. İnsanlıq tarixinin ən qara səhifələrindən biri olan Xocalı qətliamı bölgədə sülh, təhlükəsizlik və sabitlik baxımından bu gün də problem olaraq qalır. Mülki əhaliyə qarşı bu amansız və insanlığa zidd hücum və işğal nəticəsində 1 milyona yaxın azərbaycanlı qardaşımız öz yurd-yuvalarından ayrılmaq məcburiyyətində qalıb və 20 ildən çox bir müddətdə qaçqın həyatı yaşamağa məhkum ediliblər. Olayın şahidləri, qurbanları hələ həyatdadır. Yəni, Xocalıda yaşananlara tarixi bir olay kimi deyil, günümüzün bir gerçəyi olaraq yanaşmaq lazımdır. İnsanlıq adına qara bir ləkə olan bu cür hücumların təkrarlanmaması üçün beynəlxalq ictimaiyyətin bu qətliama lazımi diqqəti göstərməsi və öz etirazını ifadə etməsinin önəmini bir daha vurğulayırıq. Bu baxımdan azərbaycanlı qardaşlarımızla həmrəylik içərisində olduğumuzu bəyan etmək istəyirik. Olaya görə məsuliyyət daşıyan şəxslərin beynəlxalq məhkəmənin qarşısına çıxarılması və Ermənistanın işğal etdiyi torpaqlardan geri çəkilməsi yönündə çağırışımızı təkrarlayırıq.