Suriya hökumətinin Fövqəladə Hallar Komitəsi cümə axşamı fevralın 6-da baş vermiş zəlzələnin nəticələri ilə bağlı yekun məlumatları açıqlayıb.

Trend xəbər verir ki, bu barədə "SANA" agentliyi məlumat yayıb.

Məlumata əsasən, zəlzələ nəticəsində 414 304 insana zərər dəyib.

"Zərər çəkmiş 91,8 min ailə qeydə alınıb. 4 444 bina tam və ya qismən dağılıb", - deyə məlumatda bildirilir.
Qeyd edilir ki, dağıntılar altından 1 553 nəfəri xilas etmək mümkün olub, 6 nəfər itkin düşüb.

Daha əvvəl Suriyanın Səhiyyə Nazirliyi respublikada ən azı 1 414 nəfərin təbii fəlakətin qurbanı olduğunu, 2 349 nəfərin yaralandığını bildirmişdi. ÜST-ün məlumatına əsasən, Türkiyə ilə sərhəddəki hökumətin nəzarətində olmayan ərazilərdə 4 537 nəfər ölüb.