ABŞ-ın New Jersey ştatında güclü yağışların səbəb olduğu daşqınlar səbəbindən fövqəladə vəziyyət elan edilib.

Xalqcebhesi.az NBC News-un məlumatına görə, New Jersey qubernatoru Fil Mörfi şiddətli yağışlar səbəbindən fövqəladə vəziyyət elan edildiyini bildirərək, "Zəhmət olmasa, evinizdə qalın və lazımsız səfərlərdən çəkinin" deyib.

Digər tərəfdən, Nyu York Şəhəri Fövqəladə Hallar İdarəsi sosial media platforması X hesabından "Əgər zirzəmidə yaşayırsınızsa, diqqətli olun. Ani daşqınlar, gecə boyunca az xəbərdarlıqla baş verə bilər. Telefon, fənər və fövqəladə hallar çantanızı yanınızda saxlayın. Daha yüksək əraziyə köçməyə hazır olun" xəbərdarlığı edib.

New Jersey ştatında iyulun əvvəlində güclü yağış və fırtına nəticəsində avtomobillərin üzərinə ağac düşməsi səbəbindən 3 nəfər həyatını itirmişdi.

Digər tərəfdən, ABŞ-ın cənub ştatı Texasda 4 iyulda qəfil başlayan güclü yağışlar nəticəsində Kerr bölgəsində yerləşən Guadalupe çayı daşaraq daşqına səbəb olmuşdu.

Sel fəlakətində indiyə qədər 129 nəfərin öldüyü, təxminən 150 nəfərin itkin düşdüyü və axtarış-xilasetmə işlərinin davam etdiyi bildirilib.

Məryəm Quliyeva