İsrail Hərbi Hava Qüvvələrinin 18 avqust 2026-cı ildə Suriyanın şimal-qərbindəki İdlib əyalətində yerləşən Əbu əl-Duhur hərbi aerodromuna endirdiyi zərbə Türkiyə ilə İsrail arasında artan rəqabəti açıq şəkildə əks etdirir.

Xalqcebhesi.az xəbər verir ki, bunu iranşünas, Yaxın Şərq üzrə ekspert Vasili Papava deyib.

"İsrail təyyarələri Türkiyə sərhədindən təxminən 70 kilometr aralıda yerləşən bir aviabazanın ərazisinə və həmin obyektin anbarlarına səkkizə yaxın zərbə endirdi. Hücum nəticəsində insan tələfatı olmadı, lakin bərpa işlərinə bu yaxınlarda başlanılmış infrastruktura ziyan dəyib.

Təsir əhəmiyyətli idi. İsrail tərəfi açıq şəkildə bəyan etdi ki, zərbə Suriyanın razılaşdırılmış təhlükəsizlik status-kvosunu "birbaşa pozması" və türk qoşunlarının bazada yerləşdirilməsinə şərait yaratması səbəbindən endirilib.

Təl-Əvivin fikrincə, Türkiyə qoşunlarının Suriyadakı bazalarda olması İsrailin təhlükəsizliyinə birbaşa təhdid yaradırdı və İsrail bu barədə Dəməşqə dəfələrlə xəbərdarlıq etmişdi. Baş nazir Binyamin Netanyahu vurğuladı ki, İsrail Türkiyənin hərbi təsirinin genişlənməsinə və ya onun cənuba doğru irəliləməsinə dözməyəcək".

O, qeyd edib ki, bu hadisə adi taktiki zərbə çərçivəsindən kənara çıxır və Əsəddən sonrakı Suriya ilə bağlı iki əsas regional oyunçu arasında maraqların fundamental toqquşmasını əks etdirir. 2024-cü ilin sonlarında Bəşər Əsədin hakimiyyətdən uzaqlaşdırılmasından sonra Dəməşqdəki yeni hökumət Ankaranın dəstəyinə arxalanaraq, öz silahlı qüvvələrini, o cümlədən hərbi aviasiya imkanlarını fəal şəkildə bərpa etməyə çalışır: "İsrail, Türkiyənin təsiri altında Suriyanın hərbi imkanlarının gücləndirilməsinə yönəlmiş istənilən cəhdi və ya niyyəti həm Suriya hava məkanındakı fəaliyyət azadlığı üçün potensial təhdid, həm də İsrailin əməliyyatlarını məhdudlaşdıra biləcək bufer zonasının yaradılması istiqamətində atılan bir addım kimi qiymətləndirir".

Cavid