İdman ayrıca bir sahə kimi deyil, şəhərsalma, sosial inklüzivlik və ekoloji dayanıqlılıq siyasətlərinin tərkib hissəsi kimi nəzərdən keçirilməlidir.

Bunu WUF13 çərçivəsində keçirilən “Şəhərlər oyun və idman məkanları kimi” adlı xüsusi sessiyada İtaliyanın Azərbaycandakı səfiri Luka Di Canfrançesko deyib.

Onun sözlərinə görə, idmanın insan rifahına və cəmiyyətin inkişafına töhfəsi geniş şəkildə qəbul olunsa da, bu sahənin daha geniş strateji çərçivəyə inteqrasiyası üzrə məlumatlılığın artırılmasına ehtiyac var.

Luka Di Canfrançesko qeyd edib ki, idman infrastrukturu şəhərsalma, sosial siyasət və ətraf mühit məqsədləri ilə əlaqələndirildikdə daha effektiv nəticələr verir.

Səfir bildirib ki, İtaliya Dayanıqlı İnkişaf Məqsədlərinin lokallaşdırılması üzrə tərəfdaşlıq platforması çərçivəsində idmanla bağlı sosial və ekoloji təsiri yüksək olan layihələrin dəstəklənməsinə xüsusi önəm verir.

Onun sözlərinə görə, bu yanaşma idmanın şəhərlərin daha inklüziv və dayanıqlı inkişafına töhfəsini gücləndirir.