Yanvarın 20-də Azərbaycan Respublikasının İsrail Dövlətindəki səfirliyində 1990-cı il 20 Yanvar tarixində baş vermiş faciəvi hadisələrin 35-ci ildönümünə həsr olunmuş anım tədbiri keçirilib.

Səfirlikdən Xalqcebhesi.az-a bildirilib ki, tədbirdə İsraildə yaşayan Azərbaycan icmasının nümayəndələri, o cümlədən 20 Yanvar hadisələrinin canlı şahidləri olan şəxslər iştirak ediblər.

Tədbir 20 Yanvar gecəsi şəhid olanların xatirəsini yad etmək üçün bir dəqiqəlik sükutla başlayıb. Daha sonra səfir Muxtar Məmmədov, AZİZ Beynəlxalq Assosiasiyasının prezidenti Adam Amilov və 20 Yanvar hadisələrinin canlı şahidləri olan Azərbaycan diasporunun nümayəndələri müzakirə formatında çıxışlar ediblər.

Çıxış edənlərdən Şimon Peres 20 Yanvar gecəsi təcili tibbi yardım xidmətində çalışıb, Petr Lukimson həmin dövrdə Bakıda nəşr olunan “Elm” qəzetinin redaktoru və hadisələri işıqlandıran jurnalistlərdən biri olub. Azərbaycan Dövlət Radiosunun ictimai-siyasi verilişlər şöbəsinin keçmiş redaktoru Viktoriya Dolinskaya və onun həmkarları isə həmin gecə sovet tanklarının hücumuna məruz qalmış jurnalistlər arasında olsalar da, xilas olmağı bacarıblar.