Rusiya və Ermənistan prezidentlərinin görüşündə Dağlıq Qarabağ münaqişəsinin müzakirə olunmadığı barədə heç bir rəsmi mövqeyə rast gələ bilməzsiniz.
Bu sözləri BAXCP sədrinin müavini, analitik Elçin Mirzəbəyli deyib. Analitik bildirib ki, Ərdoğan və Putinin birgə mətbuat konfransında Dağlıq Qarabağ məsələsi haqda danışmaması Soçidə bu məsələnin müzakirə masasında olmaması anlamına gəlmir:

"Dövlət başçıları ikitərəfli görüşlərdən sonra mətbuata yalnız açıqlanması mümkün olan məqamlardan danışırlar. Mühüm əhəmiyyət kəsb edən məsələlər heç vaxt mətbuata açıqlanmır. Əks təqdirdə dövlət başçılarının görüşlərinə ehtiyac qalmazdı, telekörpü vasitəsilə canlı yayımda müzakirə aparıb, mətbuatı da hər şeydən hali edərdilər. Ərdoğan-Putin görüşündə Dağlıq Qarabağ məsələsinin gündəmdə olduğu inkaredilməzdir".
Azərbaycan və Ermənistan xarici işlər nazirlərinin Moskva səfərlərinə, Lavrovun isə Bakı və İrəvanda gözlənilən təmaslarına gəlincə, analitik hesab edir ki, bu trafiki yalnız Ərdoğan-Putin görüşü ilə əlaqələndirmək doğru olmazdı:
"Bildiyiniz kimi, Azərbaycan, Rusiya və İran prezidentlərinin Tehran zirvəsində İlham Əliyevlə Vladimir Putin arasında keçirilən görüşdə Dağlıq Qarabağ münaqişəsi müzakirə olunub. Hesab edirəm ki, münaqişənin tənzimlənməsi ilə bağlı sərgilənən diplomatik aktivlik ilk növbədə Azərbaycan və Rusiya prezidentlərinin Tehranda keçirilən görüşündən qaynaqlanır. Rəcəb Tayyib Ərdoğanın Rusiyaya səfəri də çox güman ki, bu prosesə əlavə stimul verib".
Bu arada Serj Sərkisyanın Moskva səfərinə toxunan analitik daha mühüm bir məqama da aydınlıq gətirib:
"Bunu sadəcə Dağlıq Qarabağ münaqişəsinin tənzimlənməsi ilə əlaqələndirməzdim. Serj Sərkisyan üçün hazırda prioritet məsələlərdən biri hakimiyyətinin ömrünün uzadılmasıdır. Sərkisyan İrəvanda baş verən proseslər müstəvisində növbəti addımlarını müəyyənləşdirmək üçün Moskvaya təlimat almağa gedib".