“Şanxay Əməkdaşlıq Təşkilatı 15 iyun 2001-ci ildə Çin, Rusiya, Qazaxıstan, Qırğızıstan, Tacikistan və Özbəkistan tərəfindən yaradılıb. Sonrakı illərdə Hindistan, Pakistan, İran və Belarusun qoşulması ilə təşkilatın tamhüquqlu üzvlərinin sayı 10-a çatıb. Hazırda ŞƏT-in əsas prioritetləri terrorizm, separatizm, ekstremizm, narkotiklərin qanunsuz dövriyyəsi və transmilli cinayətkarlıqla mübarizə, eləcə də ticarət, enerji, nəqliyyat dəhlizləri, rəqəmsallaşma, ekologiya və humanitar əməkdaşlığın genişləndirilməsidir”.

Bunu xalqcebhesi.az-a açıqlamasında siyasi şərhçi Alim Nəsirov deyib.

A.Nəsirov qeyd edib ki, Qırğızıstanın sədrliyi dövründə bu istiqamətlər “ŞƏT-in 25 ili: dayanıqlı sülh, inkişaf və rifah naminə birlikdə” şüarı altında birləşdirilib: “ŞƏT-in rəsmi məlumatında⁠ da təhlükəsizlik, iqtisadiyyat, rəqəmsallaşma, ekologiya və davamlı inkişaf əsas prioritetlər kimi göstərilir. Bişkek sammitinin əsas siyasi sənədi ŞƏT-in 25 illiyinə həsr olunmuş Bişkek Bəyannaməsi oldu. Ümumilikdə 28 sənəd qəbul edilib; bunların sırasında ŞƏT-in Təhdid və Çağırışlara Qarşı Universal Mərkəzinin və Antinarkotik Mərkəzinin icra strukturunun fəaliyyətini tənzimləyən sənədlər, nüvə təhlükəsizliyi üzrə çoxtərəfli tərəfdaşlıq bəyanatı və Lahorun 2026–2027-ci illər üçün ŞƏT-in turizm və mədəniyyət paytaxtı elan edilməsi barədə qərar var”.

Siyasi şərhçi diqqətə çatdırıb ki, sammitin yekun sənədləri⁠ göstərir ki, təşkilat artıq yalnız siyasi dialoq platforması deyil, konkret təhlükəsizlik və iqtisadi əməkdaşlıq mexanizmləri yaratmağa çalışır: “2016-cı ildən ŞƏT-lə dialoq tərəfdaşı kimi əməkdaşlıq edən və 2025-ci ildən “ŞƏT tərəfdaşı” statusu daşıyan Azərbaycan üçün bu platforma Şərq–Qərb və Şimal–Cənub dəhlizlərinin təşviqi, Asiya bazarlarına çıxış və çoxvektorlu xarici siyasətin möhkəmləndirilməsi baxımından əhəmiyyətlidir”.

Röya İsrafilova