Humanitar minatəmizləmə Azərbaycanın dövlət siyasətinin əsas prioritetlərindən biridir.

Bunu iqtisadiyyat nazirinin müavini Anar Axundov Bakıda “Şəhərlərin bərpası üçün humanitar minatəmizləmə: Təhlükəsiz yaşayış məskənləri üçün mükəmməllik standartlarının müəyyənləşdirilməsi” mövzusunda 4-cü Beynəlxalq Minatəmizləmə Konfransında çərçivəsində panel sessiyadakı çıxışında deyib.

Nazir müavininin sözlərinə görə, işğaldan azad edilmiş rayonlar üzrə daşınmaz əmlak və infrastruktur obyektlərinin inventarlaşdırılması artıq başa çatdırılıb.

Anar Axundov vurğulayıb ki, Qarabağ və Şərqi Zəngəzur iqtisadi rayonlarında vergi uçotunda olan və bilavasitə bu ərazilərdə fəaliyyət göstərən fiziki və hüquqi şəxslər 1 yanvar 2033-cü ilədək ƏDV və gömrük rüsumlarından azaddırlar.

O əlavə edib ki, işğaldan azad edilmiş ərazilərdə və digər müharibədən zərər çəkmiş ərazilərdə minatəmizləmə üçün istifadə olunan avadanlıq və texniki vasitələrin istehsalı və satışı da müəyyən vergilərdən azaddır.

“İşğaldan azad edilmiş ərazilərdə istehsal fəaliyyəti ilə məşğul olan müəssisələr indiyədək mühüm maşın, texnoloji avadanlıq və xammalın idxalı üzrə ümumilikdə 17,4 milyon Azərbaycan manatı məbləğində vergi və gömrük güzəştlərindən yararlanıblar”, - o diqqətə çatdırıb.

Nazir müavini bildirib ki, hazırda Qarabağ və Şərqi Zəngəzur iqtisadi rayonlarında təxminən 1 000 vergi ödəyicisi 1 300-dən çox biznes obyektində fəaliyyət göstərir.

“Parkların rezidentləri tərəfindən indiyədək təxminən 2,5 milyard Azərbaycan manat dəyərində məhsul istehsal edilib və bunun 100 milyon manatdan çox hissəsi ixrac olunub”, - Anar Axundov bildirib.

O deyib ki, təhlükəsizlik infrastrukturunun yaxşılaşdırılması və əlverişli investisiya mühiti beynəlxalq investorların da işğaldan azad edilmiş ərazilərə marağını artırır. Belə ki, Türkiyə, Özbəkistan, Litva, İsveçrə, Rusiya, Pakistan və Belarusdan olan investorlar müxtəlif sektorlarda layihələr həyata keçirirlər.

“Azərbaycan Qarabağ və Şərqi Zəngəzurda genişmiqyaslı avtomobil və dəmir yolu infrastrukturu layihələri həyata keçirir. Bu layihələr işğaldan azad edilmiş ərazilər daxilində əlaqəliliyi gücləndirməklə yanaşı, onları ölkənin milli və beynəlxalq nəqliyyat şəbəkələrinə birləşdirir”, - nazir müavini qeyd edib.

Onun sözlərinə görə, “Beynəlxalq Sülh və Rifah üçün Tramp Marşrutu”nun (TRIPP) inkişafı Avropa və Asiya arasında daha geniş bağlantılara töhfə verə və regionun tranzit, logistika və investisiya potensialını artıra bilər.

Anar Axundov bildirib ki, 25–26 sentyabr 2026-cı il tarixlərində Bakıda keçiriləcək II Azərbaycan Beynəlxalq İnvestisiya Forumu Azərbaycanın investisiya imkanlarının beynəlxalq biznes ictimaiyyətinə təqdim olunması baxımından mühüm platforma olacaq.