ABŞ Prezidenti Donald Tramp və Ukrayna Prezidenti Volodimir Zelenski Vaşinqtonun döyüş şəraitində sınaqdan keçirilmiş Ukrayna istehsalı olan pilotsuz uçuş aparatlarını almasını, Kiyevin isə əvəzində ABŞ-dən silah əldə etməsini nəzərdə tutan sövdələşməni müzakirə edirlər.

“Report” xəbər verir ki, bunu V.Zelenski “New York Post”a müsahibəsində bildirib.

V.Zelenski qeyd edib ki, onun Trampla son danışıqlarında hər bir ölkənin aviasiya texnologiyalarını gücləndirməyə kömək edəcək razılaşma diqqət mərkəzində olub.

Ukrayna lideri bildirib ki, pilotsuz uçuş aparatları onun ölkəsinə üç ildən çoxdur ki, Rusiyanın hücumunu dəf etməyə imkan verən əsas vasitədir.

"Biz bu təcrübəni Amerika və digər avropalı tərəfdaşlarla bölüşməyə hazır olacağıq", - o qeyd edib.

V.Zelenskinin sözlərinə görə, Ukrayna Danimarka, Norveç və Almaniya ilə də danışıqlar aparır.