İsrail hərbçiləri İordan çayının qərb sahilinin bir sıra rayonlarında gərginliyin artması fonunda yəhudi məskunlaşanların iki forpostunu söküblər.

Xalqcebhesi.az xəbər verir ki, bu barədə ordunun mətbuat xidməti məlumat verib.

​Bəyanata əsasən, hadisə cümə axşamına keçən gecə baş verib; forpostlar yəhudi məskunlaşanlar tərəfindən fələstinlilərin Qusra və Calud kəndləri ərazisində qanunsuz olaraq tikilmişdi. Tikililər İordan çayının qərb sahilinin 23,8%-ni təşkil edən "B zonası"nda yerləşirdi. Oslo sazişlərinə əsasən, orada mülki idarəetməni Fələstin Milli Administrasiyası həyata keçirir, hərbi nəzarət isə İsrail Müdafiə Ordusunda qalır.

​Ordudan bildirilib ki, vəziyyətin qiymətləndirilməsinin yekunlarına əsasən həmin əraziyə İsrail ordusunun 51-ci batalyonunun hərbi qulluqçuları göndərilib. "Əsgərlər təhlükəsizliyin saxlanılması və bu ərazinin mühafizəsi üçün müdafiə tapşırıqlarını yerinə yetirəcək və ərazidə patrul xidməti aparacaqlar", — deyə məlumatda qeyd olunur.

Məryəm Quliyeva