“Azərbaycanın valyuta ehtiyatları 39 mlrd. dollara çatıb“ İqtisadiyyat

“Azərbaycanın valyuta ehtiyatları 39 mlrd. dollara çatıb“

"Azərbaycanda həyata keçirilən iqtisadi islahatlar artıq real nəticələrini verir". Bunu iqtisadiyyat naziri Şahin Mustafayev Azərbaycan - Avropa İttifaqı biznes forumunda çıxışı zamanı bildirib.
Nazirin sözlərinə görə, 2017-ci ilin 4 ayında qeyri-neft sənayesi 2,8%, kənd təsərrüfatı 3,2%, ticarət dövriyyəsi 11,5%, ixrac təqribən 41%, qeyri-neft ixracı isə 23% artıb. "Bu dövrdə valyuta ehtiyatları 1,3 mlrd. dollar artıb və 39 mlrd. dolları təşkil edib. 2017-ci ilin aprelin 1-nə valyuta ehtiyatları xarici borcdan 3,2 dəfə çox olub. Azərbaycan "Qlobal Rəqabətlilik Hesabatı"nda (2016-2017) 138 ölkə arasında 37-ci, MDB ölkələri arasında isə bir neçə ildir 1-ci yerdədir".
Şahin Mustafayev əlavə edib ki, Azərbaycan prezidentinin rəhbərliyi ilə həyata keçirilən sosial-iqtisadi siyasətin başlıca istiqaməti insan kapitalının inkişafıdır.
Nazir həmçinin vurğulayıb ki, Azərbaycandakı siyasi sabitlik, zəngin təbii ehtiyatlar və iqtisadi potensial, yaradılmış əlverişli biznes və investisiya mühiti, müasir infrastruktur, əlverişli coğrafi mövqe, zəngin mədəniyyətimiz, ölkəmizin beynəlxalq aləmdə etibarlı tərəfdaş olması ölkəmizi investisiya qoyuluşu üçün cəlbedici məkana çevirib.