Zurab Azmayparaşvili: "Kim o nəticəni necə qazanır, bu, artıq ikinci məsələdi"


Avropa Şahmat İttifaqının prezidenti, kişi şahmatçılardan ibarət Azərbaycan millisinin sabiq kapitanı Zurab Azmayparaşvili Dünya Kubokunun mətbuat xidmətinin suallarına cavab verib. Apasport.az saytının məlumatına görə, gürcüstanlı mütəxəssis Bakıda təşkil olunan yarışın təşkilindən, həmyerlilərimizin şansından danışıb.


- Dünya Kubokunda artıq 1/16 final mərhələsinin ilk iştirakçıları müəyyənləşib. Turnirin ilk nəticələri barədə nə düşünürsünüz?
- Ayrı-ayrılıqda şahmatçılar haqda danışmaq istəməzdim. Rəqabət çox yüksək olduğu üçün proqnoz vermək mümkün deyil. Ümumiyyətlə Dünya Kuboku hər zaman sürpriz nəticələrlə zəngin olub. Həm gənc, həm də yaşlı nəslin nümayəndələri sona qədər mübarizə aparır. Təşkilatçılıq barədə ancaq xoş sözləri deyə bilərəm. Dünya Kuboku Bakının gözəl otellərindən birində keçirilir. Əvvəlki yarışlarda olduğu kimi Azərbaycan Dünya Kubokunu da yüksək səviyyədə təşkil edir.

- Bir müddət Azərbaycan millisinin kapitanı olmusunuz və şahmatçılarımızı yaxşı tanıyırsınız. Dünya Kubokunda azərbaycanlı şahmatçıların oyunlarını izləyirsiniz?
- Bütün görüşlərə baxıram. Məni Qədir Hüseynov yaxşı mənada təəccübləndirir. 1/32 finalda çox yaxşı oynadı. Kifayət qədər güclü rəqib sayılan David Navaraya qalib gəlmək asan deyil. Özü də tay-brekə ehtiyacı olmadı. Hüseynov Dünya Kubokuna uğurlu start götürüb.

- Eltac Səfərli və Vasif Durarbəylinin yarışı erkən tərk etməsi sizi təəccübləndirmədi?
- Eltac səviyyə və təcrübə baxımından bərabər rəqiblə oynadı. Fikrimcə Səfərli hər şeyi iki partiyada həll etməliydi. Bu rəqiblə oyunda tay-brekə ehtiyac yox idi. Duelin taleyini tay-brekə saxlamaqla səhvə yol verdi. Eltac bu mərhələni keçməyə qadir şahmatçıdı. Durarbəyli bir qədər gəncdi. Ona görə ilk mərhələdə uduzmasını normal qarşıladım.

- Şəhriyar Məmmədyarov xanım şahmatçı Xou Yifanla iki partiyada bərabər oynadı. İndi onları tay-brek gözləyir...
- Məmmədyarov böyük təcrübəyə malikdi. İkinci görüşdə qalib gəlməyə yaxın idi. Yəqin risk etmək istəmədi. Mən düşünürdüm ki, o qələbə qazanacaq və istirahət günündə rahat dincələcək. Amma tay-brek qaçılmaz oldu. Şəhriyar Xou Yifanı yaxşı tanıyır. Bununla belə səhv etdi və qələbə qazana bilmədi.

- Eyni zamanda digər şahmatçımız Teymur Rəcəbov da İsrail təmsilçisi İlya Smirinlə heç-heçə oynadı. Sizcə tay-brekdə kim daha çox şanslıdı?
- Rəcəbov hələki 2004-cü ildə keçirilən Tripolidəki yarışın planı üzrə hərəkət edir. Onun üçün ilk oyunlar bir qədər çətin oldu. Bununla belə Rəcəbov şahmat lövhəsi arxasında pis vəziyyət almayıb. Normal oynayır və tay-brekdə hər şeyi həll edir. Dünya Kuboku kimi yarışlarda hər bir şahmatçının öz strategiyası var. Əsas nəticədi. Kim o nəticəni necə qazanır, bu, artıq ikinci məsələdi. Sürətli şahmatda Teymuru daha şanslı sayıram. Bildiyimiz kimi Rəcəbov sürətli şahmatı çox yaxşı oynayır. Fikrimcə, bu dueldən 1/16 finala vəsiqə Teymura qismət olacaq. Hərçənd Smirin sona qədər mübarizə aparmağı bacarır.

- Azərbaycan millisi artıq ikiqat Avropa çempionudu. Bununla belə olimpiadalarda medal qazanmaq mümkün olmur...
- İlk dəfə çempion olanda millidə kapitan kimi çalışırdım. Azərbaycan millisi hər zaman güclülərdən sayılıb. Gələn il olimpiadada siz ilk mükafatınızı qazanacaqsınız. Hər halda bunun üçün gözəl imkan var. Şahmat olimpiadası Bakıda keçiriləcək. Sadəcə komanda kimi mübarizə apararaq uğur qazanmaq lazımdı. 2016-cı ildə Azərbaycan millisi qızıl medal uğrunda yarışmağa qadirdi.

- Almaniya millisində çıxış edən Arkadi Naydiç bundan sonra Azərbaycan komandasında çıxış edəcək. Sizcə onun gəlişi komandanı gücləndirəcək?
- Hazırda Azərbaycan millisində çalışmıram. Ona görə şərh verməyim düz olmaz. Naydiç gözəl insan və güclü şahmatçıdı. Onun gəlişi Azərbaycan millisini daha da gücləndirəcək. İşinə peşəkar yanaşan insandı. Qafqazlılar kimi emosional deyil. Azərbaycan millisinə nə qədər faydalı olacağını zaman göstərəcək.