ABŞ Türkiyəyə nə zaman sanksiya tətbiq edəcəyini bilmir.
Bunu ABŞ Dövlət Departamentinin mətbuat katibi Morqan Ortaqus deyib.
Həftəlik mətbuat konfransında jurnalistlərin suallarını cavablandıran Ortaqus bildirib ki, CAATSA proqramının tətbiq edilməsində zaman məhdudiyyəti yoxdur: “ABŞ prezidenti Donald Tramp dövlət katibi Mayk Pompeo ilə müşavirələr keçirir. Bu mövzunu prezident və dövlət katibinin ixtiyarına buraxmaq istəyirəm. Türkiyə NATO üzvü kimi İŞİD ilə mübarizədə böyük rol oynayıb. Bu zamana qədər atdığımız addımlar olduqca böyük əhəmiyyət daşıyır. NATO üzvünə sanksiya tətbiq etmək çox ciddi durumdur”.
Onu da qeyd edək ki, Rusiyadan S-400 zenit raket kompleksi aldığına görə ABŞ tərəfindən F-35 təyyarələrinin verilməməsi ilə təhdid olunan Ankara alternativlər tapıb.
F-35-lərin təhvil verilməməsi ehtimalına qarşı, ilk növbədə, Türkiyə Silahlı Qüvvələrinin arsenalındakı F-4 və F-16 təyyarələrinin istifadə müddətinin uzadılmasına start veriləcək.
İkinci addım olaraq TFX milli döyüş təyyarəsi layihəsi sürətləndiriləcək. F-35 proqramında işləyən 10 türk firması gücünü bu layihəyə istiqamətləndirəcək. TFX-in planlaşdırılandan daha tez istifadəyə verilməsi üçün bütün qaynaqlar səfərbər olunacaq.
Bu addımlarla yanaşı, yeni nəsil döyüş təyyarələrinə sahib Rusiya kimi ölkələrlə bu mövzuda əlaqə qurulacaq.