“Çexiya-Azərbaycan iqtisadi-ticarət tərəfdaşlığının gücləndirilməsi üçün potensial var”. İqtisadiyyat Nazirliyindən xalqcəbhəsi.az-a verilən məlumata görə, bunu İqtisadiyyat nazirinin müavini, Azərbaycan Respublikası Hökuməti ilə Çex Respublikası Hökuməti arasında iqtisadi, elmi-texniki və mədəni əməkdaşlıq üzrə Qarışıq Komissiyanın həmsədri Sahib Məmmədov Çex Respublikası Parlamentinin Deputatlar Palatasının Çexiya-Azərbaycan parlamentlərarası dostluq qrupunun rəhbəri Yan Kubik ilə görüşündə deyib. Nazir müavini Azərbaycan-Çexiya Qarışıq Komissiyasının bu baxımdan faydalı platforma olduğunu qeyd edib: “Bu ilin mart ayında Komissiyanın Praqada keçirilən 5-ci iclası çərçivəsində təşkil edilmiş biznes konfrans və çex şirkətlərinin rəhbərləri ilə aparılmış müzakirələr işgüzar dialoqun inkişafına töhfə verib. Ölkələrimiz arasında investisiya, ticarət, sənaye, innovasiya, nəqliyyat-tranzit və turizm sahələrində əməkdaşlığın genişləndirilməsi üçün geniş imkanlar var. Çex şirkətləri ilə Azərbaycanda mövcud olan sənaye zonaları, eləcə Ələt Azad İqtisadi Zonası çərçivəsində də əməkdaşlıq edilə bilər”.