2019-cu ildə "Azəri-Çıraq-Günəşli" neft-qaz yataqları blokunda hasilatı builki səviyyədə saxlamaq planlaşdırılır. Bunu "BP Azerbaijan"ın vitse-prezidenti Bəxtiyar Aslanbəyli deyib. O, həmçinin AÇQ yatağında "Mərkəzi Azəri" və "Qərbi Çıraq" platformalarının fəaliyyətindən danışıb. Onun sözlərinə görə, gələn ilin ikinci rübündə "Mərkəzi Azəri", oktyabr ayında isə "Qərbi Çıraq" platformasında profilaktika işləri ilə əlaqədar bu platformaların fəaliyyətinin dayandırılması planlaşdırılır.
Qeyd edək ki, AÇQ yatağında bu ilin ilk üç rübü ərzində orta sutkalıq hasilat 588 min barrel təşkil edib. Ümumilikdə, 9 ay ərzində blokdan 22 milyon tondan çox neft hasil edilib. BP və tərəfdaşları indiyədək Azərbaycandakı layihələrə 72 milyard dollardan çox sərmayə yatırıb. BP şirkəti 26 ildir ki, Azərbaycanda neft və qaz yataqlarının geoloji-kəşfiyyatı, işlənməsi və nəqli üzrə iri layihələri təhlükəsiz və etibarlı şəkildə idarə edir. Bu vaxtadək BP öz tərəfdaşları ilə birlikdə ölkədəki layihələrə 72 milyard dollardan çox sərmayə qoyub, on minlərlə iş yeri açmaqla və özünün geniş sosial sərmayə fəaliyyətlərini (yerli potensialın yaradılması, təhsil, icmaların inkişafı, yerli sahibkarlıq, idman potensialı və ölkənin zəngin mədəni irsinin tədqiqi və təbliği kimi sahələrə yönəlmiş) həyata keçirməklə yerli icmalara töhfələr verib. Azərbaycanda BP şirkətində 2 min 550 nəfərdən çox ölkə vətəndaşı işləyir və bu da, şirkətin ixtisaslaşmış heyətinin 90 faizini təşkil edir.