"Düşünürəm ki, Azərbaycana səfərimiz ikitərəfli münasibətlərimizin əla səviyyəsini bir daha təsdiqlədi. Prezident, spiker, baş nazirlə görüşlərimiz zamanı münasibətlərimizin xüsusi xarakterə malik olduğu nəticəsinə gəldik".
Bunu Çex Respublikası parlamenti Deputatlar Palatasının sədri Yan Hamaçek deyib. O bildirib ki, ölkələr arasında mövcud strateji tərəfdaşlıqla bağlı razılaşmanı daha da inkişaf etdirməyə hazırdırlar: "Bu strateji tərəfdaşlığı daha yeni və yüksək pilləyə qaldırmağa hazırıq".
Səfərin təkcə siyasi deyil, həm də iqtisadi cəhətdən əhəmiyyətə malik olduğunu söyləyən Y. Hamaçek kifayət qədər geniş biznes nümayəndə heyəti ilə Azərbaycana gəldiyini nəzərə çatdırıb. Onun sözlərinə görə, çexiyalı biznes nümayəndələri azərbaycanlı tərəfdaşlarla görüşlər keçirib və əməkdaşlığın yeni yolları ilə bağlı razılığa gəliblər: "Azərbaycan sayəsində biz enerji ehtiyacımızı diversifikasiya edirik. Çex Respublikasının idxal etdiyi neftin 30%-i Azərbaycandan gəlir. Eyni zamanda, ölkələrimiz arasında böyük ticarət defisiti mövcuddur və bunu kompensasiya etmək istərdik. Düşünürəm ki, maşınqayırma sahəsində əməkdaşlıq üçün kifayət qədər imkanlar mövcuddur. Çex Respublikası maşınqayırma sahəsində böyük istehsalçıdır və bu aspektdən əməkdaşlıq edə bilərik. Bununla yanaşı, digər sənaye məhsulları da ixrac edirik. Görüşlər zamanı, həmçinin, müdafiə və təhlükəsizlik sahəsində əməkdaşlıqla bağlı müzakirələr apardıq".