“Bu gün Azərbaycan üçün ən vacib məsələ Dağlıq Qarabağ münaqişəsinin həllidir” Siyasət

“Bu gün Azərbaycan üçün ən vacib məsələ Dağlıq Qarabağ münaqişəsinin həllidir”

Qabil Hüseynli: "BMT-nin Baş Assambleyası Təhlükəsizlik Şurasından ciddi sürətdə fərqlənir"

"BMT-nin Baş Assambleyası Təhlükəsizlik Şurasından ciddi sürətdə fərqlənir. Burada BMT-yə üzv olan 200 dövlətin hər birinin nümayəndəsi iştirak edir. Onların içərisində də Azərbaycana dost olan ölkələrin sayı kifayət qədər çoxdur. Məhz onların səyi nəticəsində Azərbaycan Təhlükəsizlik Şurasının qeyri-daimi üzvü seçilmişdi". Bu fikirləri politoloq Qabil Hüseynli deyib.
Politoloq bildirib ki, ümumiyyətlə, BMT Təhlükəsizlik Şurası Azərbaycan üçün həm məsələlərin qoyulması, həm də onun müsbət həlli baxımından prinsipal əhəmiyyətə malikdir: "Bu gün Azərbaycan üçün ən vacib məsələ Dağlıq Qarabağ münaqişəsinin həllidir. Güman edirəm ki, Azərbaycan Prezidenti İlham Əliyev Təhlükəsizlik Şurasının gündəliyinə problemin müzakirəsini saldırmağa çalışacaq. Əgər belə olsa, Təhlükəsizlik Şurasından Azərbaycan xeyrinə qətnamə çıxarılacağını böyük yəqinliklə söyləmək mümkündür".
Azərbaycan prezidentinin münaqişənin həlli ilə bağlı ciddi səylər apardığını deyən Q.Hüseynli hesab edir ki, Dövlət başçısı Nyu-Yorkda keçirilən BMT Baş Assambleyasının 72-ci sessiyası çərçivəsində həm çıxışı, həm dünya liderləri ilə görüşü zamanı problemin detalları ilə müzakirəsinə və bununla bağlı müxtəlif dövlətlərin mövqelərinin daha da dəqiqləşdirilməsinə nail olacaq: "Son dövrlər ABŞ-da problemin həllində daha müsbət mövqe tutmağa başlayıb. Bu baxımdan düşünürəm ki, sessiya çərçivəsində Azərbaycan Prezidentinin ABŞ-ın Dövlət Katibi ilə görüşü də baş tuta bilər. Görüşdə həm son dövrlər ABŞ tərəfindən problemin həllinə dair irəli sürülən plan, həm də digər TANAP, "Əsrin müqaviləsi" neft sazişinin daha 20 il müddətinə uzadılması kimi məsələlər müzakirə oluna bilər. Bildiyiniz kimi artıq Azərbaycan bütün bunlara görə Qərbin vaz keçilməz ölkəsinə çevrilib".
Politoloq əlavə edib ki, sessiya çərçivəsində Azərbaycan prezidenti İlham Əliyevin İngiltərənin Baş naziri Tereza Meylə görüşü baş tutacaq: "Çox güman ki bundan əlavə sessiya müddətində Dövlət başçısının Qərb ölkələrinin digər liderləri ilə də görüşü başa tutacaq ki, burada həm enerji, həm də əsas məsələ olan Dağlıq Qarabağ münaqişəsi müzakirə oluna bilər".