"İlk olaraq cənab Prezidentimiz İlham Əliyevi ad günü münasibətilə təbrik edirəm və ona uzun ömür, cansağlığı arzulayıram. Ölkə başçısına bu uğurlu fəaliyyətində davamlı, başarılı olmasını diləyirəm". Bunu açıqlamasında Jurnalistlərin Həmkarlar İttifaqının sədri, Mətbuat Şurasının sədr müavini Müşfiq Ələsgərli deyib.
MŞ rəsmisinin sözlərinə görə, cənab Prezidentin fəaliyyəti çoxşaxəlidir: "Birincisi nəzərə alaq ki, bu dövrdə Azərbaycanıbn müstəqilliyinin möhkəmlənməsi və ərazi bütövlüyünün bərpası uğrunda çox böyük ciddi addımlar atılıb. Azərbaycanın haqq səsi beynəlxalq aləmə çıxarılıb və ölkəmizin ərazi bütövlüyünün, suverenliyinin möhkəmlənməsi üçün çox mühüm sənədlər qəbul olunub. İkincisi bu suverenliyin möhkəmlənməsi üçün çox ciddi şəkildə addımlar atılıb. İlk növbədə Ordu quruculuğunda nailiyyətlər əldə olunub. Beləcə ordumuz öz gücünü istər 2016-cı ilin aprel döyüşləri, istərsə də 2018-ci ilin Naxçıvan əməliyyatları zamanı göstərdi. Artıq bu dövrdə Azərbaycan Ordusu müdafiə ordusu olmaqla yanaşı, həm də layiqli cavab verən, hücum edən orduya çevrilib.
Faktiki olaraq 2016-cı ilin aprel döyüşləri zamanı 2 min kvadrat kilometrdən çox və 2018-ci ildə Naxçıvan MR-də Gümrü əməliyyatları zamanı bir neçə böyük ərazilərimizin geri qaytarılmasına nail olunub. Bunlar bizim uğurlarımızdır. Mən istəyirəm ki, cənab Prezidentin və Azərbaycan dövlətinin bu uğurları davam etsin. Cənab Prezidentin fəaliyyətdə olduğu dövrdə dünya bir neçə dəfə maliyyə iqtisadi böhranı yaşayıb. Azərbaycan dövlətinin və xalqının həmin o iqtisadi böhranlardan kənarda qalması məhz ölkə başçısının siyasətinin nəticəsi olub. Azərbaycan bu dövrdə nəinki o qlobal böhranlardan kənarda qalıb, eyni zamanda özünün uğurlu inkişaf strategiyasını davam etdirib. Azərbaycanın müharibə şəraitində olmasına baxmayaraq, eyni zamanda dünyada qlobal maliyyə iqtisadi böhranı olmasına baxmayaraq ölkəmizdə iqtisadi və sosial inkişaf davam edir. Biz jurnalistlər də bu sosial proqramların faydasını görmüşük. Bu dövr ərzində dünyada olmayan bir hal baş verib və jurnalistlər üçün şəhərcik salınıb. Media sahəsində sosial proqramlar davam edir. Biz arzu edək ki, cənab Prezidentin ömrü uzun, canı sağ və hakimiyyəti davamlı olsun".