Sahib Alıyev: "Gürcü respondentlərin 92 faizi bu fikirdədir ki, Gürcüstanla ən yaxşı ilişgilər quran dövlət məhz Azərbaycandır"

"Beynəlxalq Respublikaçılar İnstitutunun Gürcüstanda keçirdiyi sorğuların nəticələrinə görə, orada rəyi öyrənilənlərin 39 faizi ən önəmli tərəfdaşlarının Amerika, 36 faizi isə Azərbaycan olduğu fikrindədir".
Bunu Milli Məclisin (MM) deputatı Sahib Alıyev dilə gətirib.
Onun dediyinə görə, respondentlərin 92 faizi isə bu fikirdədir ki, Gürcüstanla ən yaxşı ilişgilər quran dövlət məhz Azərbaycandır.
"Əgər gürcülər ölkələrinin ən önəmli tərəfdaşı kimi Azərbaycanın adını Amerikayla qoşa çəkirlərsə, onların 92%-i (!) bizimlə əməkdaşlıqdan razılıq edirsə, bu, lütf deyil. Azərbaycanın regionda oynadığı rolun, yəni reallığın dərki və təsdiqidir.
Bu, həm də bizim yumşaq güc potensialımızın da getdikcə artdığını göstərir. Belə bir potensialın təsir effekti isə bir çox hallarda sərt gücünkündən daha yüksək olur...", - deyə, S.Alıyev daha sonra qeyd edib.