"Azərbaycan Respublikasının 2022-2026-cı illərdə sosial-iqtisadi inkişaf Strategiyası"nda “Turizm sektoru iştirakçılarının fəaliyyətinin mütəmadi dialoq formasında əlaqələndirilməsi mexanizminin qurulması” fəaliyyəti üzrə 2026-cı ilədək ən azı 2 regional turizm şurasının yaradılması nəzərdə tutulub.

Dövlət Turizm Agentliyindən APA-nın sorğusuna cavab olaraq bildirilib ki, regional turizm şuralarının yerli icra hakimiyyəti və mərkəzi icra hakimiyyəti orqanlarının yerli bölmələrinin iştirakı əsas olmaqla təşkil olunması planlaşdırılır.
"Regional turizm şuralarının yaradılmasında əsas məqsəd turizmin regional səviyyədə strateji inkişafını əlaqələndirmək, turizmin inkişafı ilə bağlı birgə layihələr icra edilməsinə nail olmaqdır. Regional turizm şuralarının bölgə üzrə Regional Turizm Strategiyalarının hazırlanmasına ve icrasına cəlb olunması nəzərdə tutulur" - deyə qeyd olunub.