Elman Məmmədov: "Moskva son dövrlər problemin həlli ilə bağlı fəallıq göstərir"

"Rusiya xarici işlər naziri Sergey Lavrovun Ermənistana, daha sonra isə Azərbaycana səfəri prezidentlərin Vyana və Sankt-Peterburqda keçirilən görüşlərinin müsbət nəticələnməsinə hesablanıb. Rusiya Azərbaycan və Ermənistan dövlət başçılarının növbəti görüşünə qədər hansısa irəliləyişə nail olmağa çalışır". Bu fikirləri millət vəkili Elman Məmmədov açıqlamasında deyib. Rusiyanın son dövrlər münaqişənin həlli ilə bağlı aktivlik nümayiş etdirdiyini dilə gətirən millət vəkili söyləyib ki, artıq qonşu ölkə problemin həlli istiqamətində apardığı işlərin ədalətsiz, düzgün olmadığını dərk edərək məsələnin belə davam edə bilməyəcəyini yaxşı bilir: "O, yedəyində saxladığı alətə, yəni Ermənistana da bunu dərk etdirir. Çünki, Azərbaycan münaqişənin həlli ilə bağlı qəti mövqe ortaya qoyaraq bildirib ki, status-kvo dəyişməli, düşmənin silahlı qüvvələri Azərbaycan torpaqlarından çıxmalı, ölkəmizin ərazi bütövlüyü təmin edilməli, qaçqın və məcburi köçkünlər öz yurd-yuvalarına qayıtmalıdır. Bu baxımdan Rusiya son dövrlər problemin həlli ilə bağlı fəallıq göstərir". E. Məmmədovun fikrincə, münaqişənin həllində ən çox şansı, təzyiq və təsir mexanizmi güclü olan həmsədr dövlət elə Rusiyadır: "Son 250-300 il ərzində bu tör-töküntü etnik qrupu dünyanın ora-burasından yığıb gətirib Azərbaycan torpaqlarında yerləşdirən, onlara dövlət quran və bu günə kimi müdafiə edən imperiya çar Rusiyası olub. Sonra onun davamçısı Sovet hökuməti, indi isə Rusiya Feresiyasıdır. Bu baxımdan hesab edirəm ki, Rusiya ermənilərə təsir etmək gücünə malik olan yeganə dövlətdir. Ümumiyyətlə, Rusiya Azərbaycanla olan normal münasibətlərini daha da istiləşdirmək, çoxsahəli əməkdaşlığı davam etdirmək, Cənubi Qafqazda sabitliyin, stabilliyin qorunub saxlanması, hətta Ermənistanın gələcəkdə bir dövlət kimi mövcud olub yaşaması üçün ədalətli mövqe nümayiş etdirərək problemin həlli istiqamətdə işini davam etdirməlidir. Rusiyanın başqa yolu yoxdur. Rusiya çox yaxşı bilir ki, bu gün Azərbaycan müstəqil hərbi güc tətbiq etməklə düşmən ordusunu işğal olunmuş torpaqlardan çıxarmaq gücünə malikdir".